Batumelebi | კომენდანტის საათი 22 მაისის ჩათვლით ძალაშია – პრემიერ-მინისტრის აპარატის უფროსი კომენდანტის საათი 22 მაისის ჩათვლით ძალაშია – პრემიერ-მინისტრის აპარატის უფროსი – Batumelebi
RU | GE  

კომენდანტის საათი 22 მაისის ჩათვლით ძალაშია – პრემიერ-მინისტრის აპარატის უფროსი

საქართველოს პრემიერ-მინისტრის აპარატის უფროსმა, ნათია მეზვრიშვილმა „რუსთავის 2“-ის პირდაპირ ეთერში კომენდანტის საათის გაუქმების შესახებ ისაუბრა. მისი თქმით, შეზღუდვების გეგმაში არ იყო დასახელებული კომენდანტის საათის და, ასევე, საზოგადოებრივ ტრანსპორტზე შეზღუდვების მოხსნის კონკრეტული დრო, რადგან ეს დამოკიდებულია ეპიდემიოლოგიურ ვითარებაზე.

„ეს ყველაფერი რჩება ძალაში, საგანგებო მდგომარეობის მოქმედების ვადით. როგორც ვიცით, საგანგებო მდგომარეობის ვადამ გადაიწია 22 მაისის ჩათვლით, რაც იმას ნიშნავს, რომ მოქმედებს ყველა ის შეზღუდვა, რაც არ მოგვიხსნია 27 აპრილს. კომენდანტის საათის მოქმედებას, ისევე როგორც სხვა შეზღუდვების მოქმედებას, მაგალითად საზოგადოებრივ ტრანსპორტზე, აქვს ერთ-ერთი მნიშვნელოვანი მიზანი, ეს არის ქუჩაში მობილობის შემცირება“ – განაცხადა ნათია მეზვრიშვილმა.

მისი თქმით, კომენდანტის საათის მოქმედებამ გარკვეული გავლენა მოახდინა თავშეყრის ადგილებზე, რასაც  ქუჩებში ე.წ. ბირჟების სახით ჰქონდა ადგილი.

„თუმცა, თუ შეიცვლება ეპიდემიოლოგიური მდგომარეობა და ამის საჭიროება აღარ იქნება, შეგვიძლია კომენდანტის საათი, ასევე, შეზღუდვები საზოგადოებრივ ტრანსპორტზე გაცილებით ადრე მოვხსნათ,“ – ამბობს ნათია მეზვრიშვილი, თუმცა, მისი თქმით, 22 მაისამდე საზოგადოებრივ ტრანსპორტზე შეზღუდვების მოხსნა ნაკლებ სავარაუდოა.

„საზოგადოებრივ ტრანსპორტში გაცილებით რთულია სოციალური დისტანციის დაცვა და რისკის შემცველია. ამიტომ 22 მაისამდე ეს ნაკლებად შეიძლება ვივარაუდოთ,“ – განაცხადა მან.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com