მთავარი,სიახლეები

„ბევრი რუსია რიგში, ამიტომ ჩვენ უნდა დაგვჩაგროთ?“ – „ევრო 2000-ში“ სწავლა 5 ათასი ლარი ხდება

22.03.2023 • 22884
„ბევრი რუსია რიგში, ამიტომ ჩვენ უნდა დაგვჩაგროთ?“ – „ევრო 2000-ში“ სწავლა 5 ათასი ლარი ხდება

„ჭარბი რაოდენობა შემოედინება, ბევრი რუსი ჩადგა სკოლის რიგში და ამიტომ ჩვენ უნდა დავიჩაგროთ?“ – კითხულობს გიორგი თედოზაშვილი, ვისი შვილიც ბათუმში, კერძო სკოლა „ევრო 2000-ში“ სწავლობს. ის დღეს, 22 მარტს, სხვა მშობლებთან ერთად  სკოლის დირექციასთან ითხოვდა შეხვედრას.

სკოლა „ევრო 2000-ის“ მოსწავლეების მშობლებს უკვე აცნობეს დირექციიდან, რომ სწავლის საფასური სექტემბრიდან 3500-დან 5000 ლარამდე იზრდება. მშობლების ერთ-ერთი ვერსიით, სწავლის საფასურის გაძვირების მთავარი მიზეზი რუსულენოვანი ბავშვები არიან, რომლებსაც ამ სკოლის რუსულენოვან სექციაში სწავლა სურთ, მაგრამ სკოლაში მოსწავლეების გაზრდილი რაოდენობისთვის ადგილი აღარ ჰყოფნით.

„შესაძლოა, რუსებს უთავისუფლებენ ადგილებს, ყველაფერში ესენი არიან უკვე, სიმრავლეა,“ – გვიყვება გიორგი თედოზაშვილი, – „დირექტორმა გვითხრა, სტუმრები გვყავს გერმანიიდან, პირველი აპრილიდან ცალ-ცალკე შეგხვდებით და დაგელაპარაკებითო, მაგრამ ეს რაც ხდება, უფლებების ჩამორთმევას ნიშნავს. რატომ უნდა შეიზღუდოს ჩემი და ჩემი შვილის უფლებები?

ამ სკოლამ და სამინისტრომაც ხომ უნდა იფიქროს, რომ ეს მოსწავლეები კერძო სკოლაში არიან და სახელმწიფოს კისერზე არ არიან?

შეიძლება, სკოლის დირექტორს ჰგონია, რომ ჩვენი ბიუჯეტი გაუმჯობესდა, მე ვსვამ კითხვას: რა გამიუმჯობესდა, რომ გადასახადს მიზრდი? ჩემი ხელფასი არ გაზრდილა, ბატონო და ქუჩაში უნდა დარჩეს ჩემი შვილი?

კანონი უნდა იყოს ისეთი და განათლების სამინისტრო იმ დონეზე, რომ სკოლა ასე ვერ მოიქცეს. სკოლა უნდა გრძნობდეს სახელმწიფოს წინაშე ვალდებულებას. მომავალ თაობას როცა ზრდი, მარტო ცოდნის მიცემა კი არაა საქმე, არამედ ის, თუ რას ასწავლი მომავალ თაობას? იმას ასწავლი, რომ ფულზე ემსახუროს სამშობლოს? იმიტომაცაა, რომ ფულზეა გაყიდული მთელი ქვეყანა,“ – გვითხრა გიორგი თედოზაშვილმა.

„არ არის გამორიცხული, რუსულ სექტორში სურდეთ ბავშვების მიღება და ამიტომაც იზრდება ასე სწავლის საფასური… დირექტორმა თქვა, სკოლა იძულებულია, ეს ნაბიჯი გადადგასო, მაგრამ სხვა ვერაფერი გავიგე, ინდივიდუალურად ჩაეწერეთ მიღებაზე და ისე მოდითო,“ – ამბობს მზია შუშანიძე.

სკოლა „ევრო 2000“-ის შესასვლელთან დღეს დილით შეკრებილი მშობლების ერთმა ჯგუფმა მედიასთან ვინაობის გამხელა არ ისურვა, „შვილები გაგვიბრაზდებიან, ისედაც სტრესში არიან და ტირიანო“.

„სკოლის დირექტორმა გვითხრა, სკოლაა ახლა გადასარჩენიო. რისგან უნდა გადავარჩინოთ, არ ვიცი, მაგრამ ხშირად დირექცია ფარად იყენებს იმას, რომ მასწავლებლების ხელფასი უნდა გაიზარდოს… წინა წლებშიც იზრდებოდა სწავლის გადასახადი, მაგრამ ახლა ერთიანად 45 %-ით ზრდიან საფასურს,“ – გვითხრა ერთ-ერთი მოსწავლის მშობელმა.

„გადასახადი რის სანაცვლოდ იზრდება?“ – კითხულობს კიდევ ერთი მოსწავლის დედა, – „სწავლის საფასური იზრდება ისე, რომ ამას არანაირი შეხება არ აქვს სწავლის ხარისხთან. ამ სკოლაში უამრავი პრობლემაა, მაგრამ მაინც აქ დაგვყავს შვილები, რადგან შედარებით უკეთესია… ვისაც არ მოგწონთ, წაიყვანეთო, პასუხი ეს არის… იმასაც ვერ ხვდებიან, რამხელა სტრესი შეიძლება განიცადონ 13 და 14 წლის მოზარდებმა, როცა პირველი კლასიდან ერთად მოდიან ბავშვები.

ჩემი აზრით, არც არავინ გაითვალისწინებს ჩვენს მოთხოვნებს, რადგან ურჩევნიათ, რომ გადაუხადონ გაცილებით მეტი თანხა. ყველა ოჯახი ნამდვილად ვერ შეძლებს წლიურად 5 ათასი ლარის გადახდას და დატოვებს სკოლას“.

„ბათუმელებს“ სკოლის დირექციიდან არავინ შეხვდა. სკოლის დაცვის სამსახურის თანამშრომლის თქმით, დირექციას სტუმრები ჰყავს გერმანიიდან.

ჩვენ ტელეფონით დავუკავშირდით სკოლის დირექტორს, ანზორ აბუსერიძეს, რომელმაც გვითხრა, რომ კითხვებს ვერ უპასუხებს, რადგან ამისთვის არ სცალია და სკოლის ადმინისტრაციიდან ვერც სხვა ვინმე გაგვესაუბრება.

გადაბეჭდვის წესი


ასევე: