რეკლამა,სიახლეები

მიმოწერით მეგობრობა – ევრო-2000-ის გერმანული ენის მასწავლებლის პროექტი

23.11.2020 • 1597
მიმოწერით მეგობრობა – ევრო-2000-ის გერმანული ენის მასწავლებლის პროექტი

სკოლა ევრო-2000-ის გერმანული ენის კათედრის უფროსი მასწავლებელი, სოფიო აფხაზავა 2020 წლის თებერვლიდან 2021 წლის იანვრის ბოლომდე პედაგოგთა გაცვლითი პროგრამის ფარგლებში კვალიფიკაციის ამაღლების მიზნით იმყოფება გერმანიაში, ქ. დუისბურგის ლანდფერმანის სახელობის გიმნაზიაში.

სოფიო აფხაზავას პრაქტიკის ფარგლებში პროექტის მომზადება დაევალა. მან გადაწყვიტა, ისეთი პროექტი გაეკეთებინა, რომელშიც ჩართული იქნებოდნენ ჩვენი სკოლის მოსწავლეებიც. თავის გერმანელ კოორდინატორთან და ჩვენი სკოლის გერმანული ენის პედაგოგებთან შეთანხმებით გადაწყდა, რომ პროექტში ,,მიმოწერით მეგობრობა“ მე-7 კლასის A ჯგუფი (ამ ჯგუფის გერმანული ენის მასწავლებლები არიან სოფიო აფხაზავა და გურანდა ფარცვანია) ჩართულიყო.

ჩვენს სკოლაში ამ პროექტისთვის საჭირო მოსამზადებელი სამუშაოები გურანდა ფარცვანიამ ჩაატარა, ხოლო გერმანიის ქ. დუისბურგის ლანდფერმანის სახელობის გიმნაზიაში მოსწავლეებთან უშუალო კავშირი სოფიო აფხაზავას ჰქონდა. გერმანელ და ქართველ მოსწავლეებს შორის გაიმართა მეგობრული მიმოწერა ელექტრონული ფოსტის მეშვეობით. დაინტერესება ორივე მხრიდან დიდი იყო. ბავშვები ყოველი ახალი წერილის მოსვლას მოუთმენლად ელოდნენ. ქართველმა და გერმანელმა მოსწავლეებმა ინფორმაციები გაცვალეს თემებზე: „ჩემი ოჯახი“, „ჩემი თავისუფალი დრო“, „ჩემი მეგობარი“, „ჩემი დღის განრიგი“, „ჩემი არდადეგები“.

აღნიშნულმა მიმოწერამ ხელი შეუწყო მოსწავლეთა მოტივაციის ამაღლებას, ჩვენი მოსწავლეების გერმანული ენისადმი ინტერესის მომატებას, რადგან მათ ენის აუთენტურ სიტუაციაში გამოყენების შესაძლებლობა მიეცათ.

მიუხედავად პანდემიით განპირობებული რთული სიტუაციისა, პროექტი წარმატებით განხორციელდა და მიმოწერა ბავშვებს შორის დღემდე გრძელდება.

რამდენიმე დღის წინ სოფიო აფხაზავამ პროექტი პროგრამის ხელმძღვანელებს წარუდგინა. პრეზენტაცია დადებითად შეფასდა და მან დიდი მოწონება დაიმსახურა.

გადაბეჭდვის წესი


ასევე: