ქობულეთის მუნიციპალიტეტის სოფელ ლეღვადან ბათუმში ჩამოსულ დედას და მის 10-წლამდე შვილს კორონავირუსი დაუდასტურდა. ქალი ორ ბავშვებთან ერთად გამოვიდა სოფლიდან და ბათუმში მშობლებს სტუმრობდა. ინფექციონისტებმა მათ სახლში მიაკითხეს და დედა შვილებთან ერთად ბათუმის ინფექციურ საავადმყოფოში გადაიყვანეს.
Covid-19 ერთ ბავშვს არ დაუდასტურდა. შესაბამისად, ის ბებიასთან და ბაბუასთან ერთად დარჩება თვითიზოლაციაში, მათთან დაკავშირებული 2 პირი კი – კარანტინში.
სოფელ ლეღვაში 13 აპრილს 5 პირს დაუდასტურდა კორონავირუსი, მათ შორის არის ასევე ორი – ერთწლამდე და ათწლამდე – ბავშვი. დედა და ერთწლამდე ბავშვი იმავე დღეს გადაიყვანეს თბილისის შესაბამის კლინიკაში.
აჭარის ჯანდაცვის მინისტრის მოადგილის, ნინო ნიჟარაძის ინფორმაციით, ქობულეთის კლასტერში უკვე 29 პირია ინფიცირებული.
ქვეყანაში კი, 15 აპრილის დილის მონაცემებით, Covid 19-ით 306 პირია ინფიცრებული. წუხანდელი ღამის შემდეგ ინფიცრებულთა რაოდენობა 12-ით გაიზარდა.
____
შენიშვნა: სტატიის თავდაპირველ ვერსიაში ეწერა, რომ ქალი სოფლის ჩაკეტვის შემდეგ ჩამოვდა ბათუმში. ჯანდაცვის სამინისტროს ცნობით, ქალი სოფლიდან 9 აპრლს გამოვიდა.
