აჭარის ჯანდაცვის მინისტრის მოადგილის, ნინო ნიჟარაძის განცხადებით, დღეს, 14 აპრილს, ცხელების კლინიკიდან კორონავირუსის კვლევაზე კიდევ შევა 15 ახალი ნიმუში, რომლის შედეგები დღეს საღამოს იქნება ცნობილი.
„როგორც ვიცით, ქობულეთის კლასტერიდან გუშინ დაემატა 5 დადასტურებული შემთხვევა, ერთი იყო იმპორტირებული, აქედან გამომდინარე, კლინიკაში უკვე 27 ადამიანი მკურნალობს კორონავირუსზე. მათგან ორის მდგომარეობა არის სტაბილურად მძიმე, დანარჩენების მდგომარეობა არის მსუბუქი და საშულო სიმძიმის,“ – განაცხადა ნინო ნიჟარაძემ.
ნინო ნიჟარაძის თქმით, ქობულეთის კლასტერიდან ჯამში 25 დადასტურებული შემთხვევა გვაქვს, ამასთან, არსებობს 370 კონტაქტირებული პირი, რომელიც მოიცავს როგორც პირველი, ასევე მეორე რიგის კონტაქტებს. ნიჟარაძის თქმით, ყველა მათგანი თვითიზოლაციაშია.
„ამ 370-დან 200 პირი უკვე არის დიაგნოსტირებული და ქობულეთის 25 შემთხვევა ამათგან არის გამოვლენილი ჯამურად.
მასიური თერმოსკრინინგის შედეგად, 3 700 ადამიანიდან გამოვლინდა 17 საყურადღებო შემთხვევა, რომელთაგანაც 3-ის კვლევის ნიმუში უკვე აღებულია, დანარჩენი კვლევის ნიმუშები დღეს იქნება აღებული,“ – ამბობს ნინო ნიჟარაძე.
ჟურნალისტების კითხვაზე, რატომ გადაჰყავთ ინფიცირებული ბავშვები თბილისში სამკურნალოდ, ნინო ნიჟარაძე ამბობს, რომ ეს არის ოჯახის, მშობლების გადაწყვეტილება, „რადგან ცენტრალურ დონეზე უფრო არსებობს პრაქტიკული გამოცდილება ამ შემთხვევების მართვის,“- ამბობს ნინო ნიჟარაძე. მისივე თქმით, თბილისში გადაყვანილი ბავშვის მდგომარეობა ტრანსპორტირების დროს მსუბუქი იყო.
