Batumelebi | საფრანგეთში საგანგებო მდგომარეობა 11 მაისამდე გაგრძელდა საფრანგეთში საგანგებო მდგომარეობა 11 მაისამდე გაგრძელდა – Batumelebi

საფრანგეთში საგანგებო მდგომარეობა 11 მაისამდე გაგრძელდა

საფრანგეთის პრეზიდენტმა ემანუელ მაკრონმა დღეს, 13 აპრილს, საგანგებო რეჟიმი კიდევ ერთი თვით, 11 მაისამდე გადაავადა და ქვეყნის მდგომარეობაზე ისაუბრა.

„ვირუსი ჯერ კიდევ შეუსწავლელია ბოლომდე. უნდა ვაღიაროთ, რომ ისევე როგორც მთელ მსოფლიოს, ჩვენც არ გვქონდა საკმარისი აღჭურვილობა  – ხელთათმანები, სადეზინფექციო ხსნარები… არ გვქონდა იმდენი ნიღაბი, რამდენიც გვინდოდა, რომ დაგვერიგებინა მედპერსონალისთვის. პრობლემები იდენტიფიცირებულია და ხელისუფლება, ადგილობრივი ორგანიზაციები, მობილიზებულია, რომ ვაწარმოოთ საჭირო პროდუქცია. ვაცნობიერებ, რომ ბრძოლის წინა ხაზზე აღმოვჩნდით. ჩვენმა საწარმოებმა და დასაქმებულებმა მოთხოვნის შესაბამისად იმოქმედეს და მომავალი სამი კვირის განმავლობაში პირბადეების წარმოებას 5 ჯერ გავზრდით, გვექნება რეანიმაციებისთვის საჭირო 10 000 ახალი რესპირატორი.

ბევრი რამ ველზე ვისწავლეთ ვირუსთან ბრძოლის პროცესში. ბევრი გადაწყვეტილებაც ამ პირობებში მივიღეთ. ჩვენ ეს ყველაფერი გვემახსოვრება, როგორც უდიდესი ძალა მომავლისთვის.

ბევრი კონსულტაციის შემდეგ გადავწყვიტე, მესაუბრა თქვენთან იმაზე, თუ რა გველის შემდეგ კვირებსა და თვეებში. სამედიცინო სისტემა დიდი წნეხის ქვეშაა და ეპიდემია ჯერ ისევ არ იხევს უკან. შესაბამისად, ძალისხმევა არ უნდა დავიშუროთ და უნდა დავიცვათ წესები. ამ წესების დაცვა სიცოცხლის გადარჩენას ნიშნავს. სწორედ ამიტომ, საგანგებო მდგომარეობა 11 მაისამდე გაგრძელდება საფრანგეთში. ამის მიზანი ვირუსის კიდევ უფრო გავრცელების შეჩერებაა. იზოლაციის გაგრძელებით ჩვენ დავეხმარებით რეანიმაციებს, რომ გაუთავისუფლდეთ საწოლები. დავეხმარებით მედპერსონალს აღიდგინონ ძალები. ქრონიკული დაავადების მქონე ადამიანებს ახლა სჭირდებათ, შეძლონ მივიდნენ ექიმებამდე და იმკურნალონ, რადგან მკვლელი მხოლოდ ვირუსი არ არის მათთვის. სახელმწიფოსა და კომპანიების მხრიდან გაგრძელდება შეღავათებისა და კომპენსაციების გაცემა, მათთვის, ვინც პანდემიის პერიოდში სამსახური დაკარგა,“ – ამბობს მაკრონი.

საფრანგეთის პრეზიდენტის თქმით, 11 მაისის შემდეგ ქვეყანაში ეტაპობრივად გაიხსნება სკოლები, კოლეჯები და ბაღები, მაგრამ არა უმაღლესი სასწავლებლები. უნივერსიტეტების გახსნა, მისი თქმით, ზაფხულამდე არ იგეგმება.

საზოგადოებრივი თავშეყრის ადგილები კვლავ დაკეტილი იქნება. ბარები, რესტორნები, სასტუმროები, კინოთეატრები, თეატრები, საკონცერტო დარბაზები და მუზეუმები. არ გაიმართება არც დაგეგმილი ფესტივალები მინიმუმ ივლისის შუა რიცხვებამდე.

11 მაისიდან სიმპტომების მქონე ყველა ადამიანს გაუკეთებენ საფრანგეთში ტესტირებას და ხელმისაწვდომი იქნება პირბადეები საფრანგეთის ყველა მოქალაქისთვის. მომდევნო კვირაში კი ყოველდღიურად გაიზრდება ეტაპობრივად ტესტების რაოდენობა ქვეყანაში.

პრეზიდენტის თქმით, დახმარება გაეწევათ იურიდიულ და ფიზიკურ პირებს. ამოქმედდება კონკრეტული გეგმები ტურიზმის, სასტუმროს, კვების მრეწველობასა და კულტურის სფეროში დასაქმებულებისთვის, ვისაც არსებულმა მდგომარეობამ ზარალი მიაყენა. მისივე განცხადებით, განსაკუთრებული ყურადღების ქვეშ იქნებიან ბავშვიანი, შეჭირვებული ოჯახები – მათი მდგომარეობის შესამსუბუქებლად ხელისუფლება კონკრეტული გეგმის შემუშავების პროცესშია.

საფრანგეთში ჯამში ახალი კორონავირუსის 98 076 შემთხვევაა გამოვლენილი, გარდაცვლილია 14 967 ადამიანი, მათ შორის 574 ბოლო 24 საათის განმავლობაში.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com