Batumelebi | გახარია: „ქობულეთში გვაქვს სერიოზული კლასტერი“ გახარია: „ქობულეთში გვაქვს სერიოზული კლასტერი“ – Batumelebi

გახარია: „ქობულეთში გვაქვს სერიოზული კლასტერი“

პრემიერმა გიორგი გახარიამ ქვეყანაში საგანგებო მდგომარეობის წესების კიდევ უფრო შესაძლო გამკაცრებაზე დღეს, 9 აპრილს, ისაუბრა და ის რეგიონები დაასახელა, სადაც, მისი ინფორმაციით, COVID 19-ის გავრცელების რთული კლასტერებია. პრემიერის ინფორმაციით, რთული ვითარებაა ქობულეთშიც.

ეპიდემიოლოგები ქობულეთის მუნიციპალიტეტის სოფელ გვარაში გუშინ, 8 აპრილს, მთელი დღის განმავლობაში მუშაობდნენ. მათ შეისწავლეს ასევე მუნიციპალიტეტის საავადმყოფოებში არსებული ვითარება. ამასთან დაკავშირებით აჭარის ჯანდაცვის მინისტრის მოადგილემ, ნინო ნიჟარაძემ დღეს დილით განაცხადა, რომ ქობულეთში ეპიდემიოლოგებმა შეისწავლეს შიდაგადაცემის შემთხვევა, რომლის შედეგადაც ინფიცირებულია 6 პაციენტი:

„ქობულეთის კლასტერთან დაკავშირებით აღრიცხულია 108 კონტაქტი, რომელთაც კავშირი ჰქონდათ 6 ინფიცირებულ პირთან. მათზე დაკვირვება მიმდინარეობს და საჭიროების შემთხვევაში ჩატარდება კვლევა, პროტოკოლის დაცვით.“

აჭარის ჯანდაცვის სამინისტროს ინფორმაციით, ამ დროისთვის ქობულეთში თვითიზოლაციაშია 15 ოჯახი, ეპიდემიოლოგები კი მუნიციპალიტეტში დღეს, 9 აპრილსაც, აგრძელებენ მუშაობას.

ქობულეთის მუნიციპალიტეტის სოფელ გვარაში, ერთ-ერთ ოჯახში, სტუმრად იმყოფებოდა 54 წლის ქალი, რომელსაც კორონავირუსი დაუდასტურდა. სწორედ ამ პაციენტს უკავშირდება ლაბორატორიულად დადასტურებული ხუთი შემთხვევა ქობულეთში.

ამ პაციენტთან კონტაქტის გამო კარანტინშია ბათუმში მომუშავე სასწრაფო სამედიცინო სამსახურის ორი ბრიგადა – სულ 6 პირი, ასევე, სამედიცინო ცენტრ „მედინას“ 10 და ბათუმის სამედიცინო ცენტრ BMC-ის 4 თანამშრომელი.  მოგვიანებით  გაირკვა, რომ სასწრაფოს პერსონალს კორონავირუსი არ აღმოაჩნდა.

________

4 აპრილს 54 წლის ქალმა მუცლის მწვავე ტკივილის გამო 112-ზე დარეკა და სასწრაფო გამოიძახა. სასწრაფომ ქალი ბათუმის სამედიცინო ცენტრ BMC-ში გადაიყვანა.

ვინაიდან ეროვნული პროტოკოლით მოწოდებული დეფინიციით არ შეესაბამებოდა პაციენტის ჩივილები სავარაუდო კოვიდ 19-ის კრიტერიუმებს, მას მხოლოდ მუცლის ტკივილის შესაბამისი მკურნალობა ჩაუტარდა და გაეწერა ბინაზე დამაკმაყოფილებელ მდგომარეობაში 5 აპრილს, დილით, – განმარტეს სამედიცინო ცენტრში.

5 აპრილს, საღამოს, 54 წლის ქალმა სასწრაფო დახმარება მეორედ გამოიძახა. სასწრაფომ ქალი ამჯერად სამედიცინო ცენტრ „მედინაში“ გადაიყვანა.

ჯანდაცვის სამინისტროს ინფორმაციით, დღეს ეპიდემიოლოგები ქობულეთის საავადმყოფოებში არსებულ სიტუაციასაც შეისწავლიან.

ამ სოფელში 1089 ადამიანი ცხოვრობს.

ნეტგაზეთის მასალების სხვა გამოცემებში გადაბეჭდვის წესი
ავტორი