აჭარის ჯანდაცვის მინისტრის მოადგილის, ნინო ნიჟარაძის განცხადებით, გუშინ, 8 აპრილს, აჭარაში კორონავირუსზე 116 ნიმუში აიღეს. მისი თქმით, ყველა პასუხი უარყოფითია, კორონავირუსი არც ერთ პირს არ აღმოაჩნდა.
„გუშინ, დღის განმავლობაში, ყველა სამედიცინო დაწესებულებიდან, საკარანტინე ზონიდან, ამ დაავადებულთან ირგვლივ მყოფი კონტაქტებიდან, შევიდა 116 ნიმუში და ყველასთან მიმართებაში გვაქვს უარყოფითი პასუხი, გუშინ დადასტურების შემთხვევა არ გვქონია,“ – განაცხადა ნინო ნიჟარაძემ.
მისი თქმით, ეპიდემიოლოგებმა შეისწავლეს ქობულეთში შიდაგადაცემის შემთხვევა, რომლის შედეგადაც ინფიცირებულია 6 პაციენტი.
ქობულეთის კლასტერთან დაკავშირებით აღრიცხულია 108 კონტაქტი, რომელთაც კავშირი ჰქონდათ 6 ინფიცირებულ პირთან. მათზე დაკვირვება მიმდინარეობს და საჭიროების შემთხვევაში ჩატარდება კვლევა, პროტოკოლის დაცვით.
„ჩვენ ავიღეთ დაახლოებით 40 ნიმუში, ეს გახლავთ როგორც სამედიცინო პერსონალის, ქობულეთის, ასევე ოჯახური კონტაქტები. კონტაქტებიდან ნიმუშების აღება ხდება გარკვეული ვადის დაცვით, პროტოკოლის გათვალისწინებით, რაც მოიცავს რესპირაციულ ჩივილებზე ზედამხედველობას და კონტაქტიდან გასული დღეების რაოდენობას. ამის გათვალისწინებით, ის რაოდენობა, რომელიც უკვე გატესტილია, შეიძლება ითქვას, რომ ძირითადი რისკი ამ პირებთან დაკავშირებით თითქმის გადავლილია, მაგრამ მაინც რჩება რამდენიმე დღე, ზედამხეველობის პერიოდი, ამიტომ ყველა პირს აქვს მკაცრი რეკომენდაცია თვითიზოლაციისა და კარანტინის, ნაწილი არის კარანტინში, ნაწილი – თვითიზოლაციაში,“ – განაცხადა ნინო ნიჟარაძემ.
მან ასევე აღნიშნა, რომ ე.წ. ქობულეთის კლასტერთან დაკავშირებით კონტაქტების რაოდენობა შეიძლება გაიზარდოს, მაგრამ ეს იქნება ერთეული შემთხვევები, რადგან ძირითადი კონტაქტები უკვე მოძიებულია.
ნინო ნიჟარაძემ ასევე განაცხადა, რომ ქობულეთში საავადმყოფოს გახსნის შესახებ დღის ბოლომდე იქნება გადაწყვეტილება მიღებული.
აჭარაში დადასტურებული კორონავირუსის დიაგნოზით ამჟამად 14 პაციენტს მკურნალობენ, მათგან ერთის მდგომარეობა სტაბილურად მძიმეა.
9 აპრილის 11 საათის მონაცემებით, საქართველოში დადასტურებულია კორონავირუსის 214 შემთხვევა, გამოჯანმრთელდა 50 ადამიანი, გარდაიცვალა – 3.
კარანტინში 4 559 ადამიანი იმყოფება, სტაციონარში მეთვალყურეობის ქვეშ კი – 353.
