Batumelebi | გომისმთას ოზურგეთმა სტატუსი მიანიჭა – როგორ დააკანონებენ სახლებს გომისმთას ოზურგეთმა სტატუსი მიანიჭა – როგორ დააკანონებენ სახლებს – Batumelebi

გომისმთას ოზურგეთმა სტატუსი მიანიჭა – როგორ დააკანონებენ სახლებს

ოზურგეთის საკრებულოს 2020 წლის 31 მარტის განკარგულებით, ოზურგეთის მუნიციპალიტეტის ადმინისტრაციულ საზღვრებში მდებარე „ისტორიულად ჩამოყალიბებულ უბანს“ [საკურორტო ადგილს] „გომისმთა“ ეწოდა. განკარგულება ძალაში 6 აპრილს შევიდა. როგორც დოკუმენტშია აღნიშნული, ოზურგეთის მერიამ „ოთხი თვის ვადაში უნდა უზრუნველყოს საჭირო ღონისძიებების განხორციელება“.

ოზურგეთის მერის მოადგილის, ირაკლი სირაძის განცხადებით, როცა შესაბამისი პროცედურები დასრულდება, შემდეგ დადგინდება წესი, თუ როგორ მოხდება გომისმთაში მიწის გასხვისება, მშენებლობა ან არსებული სახლების დაკანონება.

„ყველაფერი მოხდება შესაბამისი კანონმდებლობის სრული დაცვით. ეს პროცედურები კი ვერ განხორციელდებოდა, ვინაიდან დასახლებას სტატუსი არ ჰქონდა. ყველაფერი მოექცევა კანონის ჩარჩოებში,“ – გვითხრა ირაკლი სირაძემ.

გომისმთის მიმდებარედ სახლები წლებია მოქალაქეებს იმ ტერიტორიაზეც აქვთ, რომელიც აჭარის ავტონომიური რესპუბლიკის, კონკრეტულად კი, ქობულეთისა და შუახევის მუნიციპალიტეტების ადმინისტრაციულ საზღვრებშია.

იმისთვის, რომ მოქალაქეებს კუთვნილი სახლების დაკანონების საშუალება მიეცეთ, შესაძლოა ქობულეთისა და შუახევის მუნიციპალიტეტებსაც იმ პროცედურების გავლა მოუწიოთ, რასაც ოზურგეთი ამ ეტაპზე გადის.

ქობულეთის მერიაში „ბათუმელებს“ უთხრეს, რომ ამ კუთხით გარკვეული სამუშაოები დაწყებულია და შესაბამისი კავშირები აქვთ, როგორც ოზურგეთის, ასევე შუახევის მუნიციპალიტეტთან.

„მიმდინარე პროცესებმა ცოტა ხელი შეგვიშალა, ამ კუთხით ვმუშაობთ, თუმცა კონკრეტულ დეტალებზე ამ დროისთვის ინფორმაციას ვერ მოგაწვდით,“ – გვითხრა დავით ვერულიძემ, ქობულეთის მერის მოადგილემ.

ქობულეთის მერიაში გვითხრეს, რომ აღნიშნულ საკითხზე მოგვიანებით დაგვიკავშირდებიან.

„გომისმთა არის, ასე ვთქვათ, ზიარი მთა ოზურგეთის, ქობულეთისა და შუახევის, თუმცა ძირთადი ტერიტორია ოზურგეთის მუნიციპალიტეტშია. შუახევის საზღვრებში მცირედი ნაწილი შემოდის. რაიმე პროცედურები ჩვენთან ამ ეტაპზე არ მიმდინარეობს, თუმცა, შესაბამის მუნიციპალიტეტებთან თანამშრომლობით პრობლემა, მაგალითად, იგივე სახლების დაკანონებაზე, მოქალაქეებს არც შუახევის ტერიტორიაზე ექნებათ,“ – გვითხრა ომარ ტაკიძემ, შუახევის მერის მოადგილემ.

წითელი ხაზით შემოსაზღვრულია გომისმთა – ტერიტორია ოზურგეთის მუნიციპალიტეტში, რომელსაც სტატუსი მიენიჭა. ყვითელი ხაზით გავლებულია ადმინისტრაციული საზღვარი გურიასა და აჭარას შორის.

კურორტ გომისმთაზე მიწის ნაკვეთი ან საცხოვრებელი სახლი სამართლებრივად რეგისტრირებული ამ ეტაპზე არავის აქვს.

„ჯერ უნდა მიენიჭოს „გომისმთას“ დასახლებული პუნქტის სტატუსი, რომ იქ ადამიანებმა საკუთრების რეგისტრაცია შეძლონ,“ – უთხრეს რვა თვის წინ „ბათუმელებს“ ოზურგეთის მერიაში.

გარემოს დაცვისა და სოფლის მეურნეობის სამინისტრო კი გურიაში, ჩოხატაურის მუნიციპალიტეტში, დაცული ტერიტორიების შექმნას გეგმავს, თუმცა ამისათვის ჯერ შესაბამისი კვლევებია საჭირო, რომელიც ბუნების დაცვის მსოფლიო ფონდის (WWF) მხარდაჭერით ჩატარდება.

გურიაში რომელ ადგილს შეიძლება მიანიჭონ დაცული ტერიტორიის სტატუსი? – დაცული ტერიტორიების სააგენტოს თავმჯდომარის მოადგილე, თომა დეკანოიძე „ბათუმელებთან“ ამბობს, რომ განიხილება აჭარა-იმერეთის ქედის ჩრდილოეთი ნაწილი, მათ შორის, კურორტების – ბახმაროსა და გომისმთის მიმდებარე ტერიტორიებიც.

____________________

მთავარი ფოტო: გომისმთა ივნისში. გურამ მურვანიძის ფოტო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com