კორონავირუსის სწრაფად გავრცელებამ განსაკუთრებით დააზარალა ევროპის ქვეყნებში მოხუცთა თავშესაფრები. ამ მხრივ გამონაკლისი არც საფრანგეთი ყოფილა. დაზარალდნენ როგორც თავშესაფრის ბინადრები, ასევე პერსონალი.
უკანასკნელი, 7 აპრილის მონაცემებით, კორონავირუსით საფრანგეთში გარდაცვლილია 10 328 ადამიანი, მათგან 3 237 – მოხუცთა თავშესაფარში.
როგორც ქალაქის მერმა, ანნა იდალგომ გუშინ, 7 აპრილს განაცხადა franceinfo – სთან, მხოლოდ პარიზში მოხუცთა თავშესაფრებში 172 პირია გარდაცვლილი.
ქვეყნის საზოგადოებრივი ჯანდაცვის ოფიციალური ინფორმაციით (Santé Publique France), 4 აპრილის მონაცემებით, საფრანგეთში მოხუცთა 2355 თავშესაფარში ყველგან დაფიქსირდა Covid 19-ით ინფიცირების მინიმუმ ერთი შემთხვევა.
ვირუსით განსაკუთრებით დაზარალდა კანთან ახლომდებარე სოფელ მუჟენის მოხუცთა თავშესაფარი, სადაც 109 ხანდაზმული იყო, გასულ შაბათ-კვირას მათგან ყოველი მესამე ადამიანი გარდაიცვალა – თავშესაფრის 31 მცხოვრები. სკრინინგის შედეგად გამოვლინდა, რომ ინფიცირებულია თავშესაფრის მომსახურე პერსონალიც, 50 დასაქმებულიდან 14-ს კორონავირუსი დაუდგინდა.
მაგრამ სკრინინგის შესაძლებობები და ტესტების რაოდენობა შეზღუდულია, თავშესაფრების ამგვარად შესამოწმებლად კი ტესტების დიდი რაოდენობა იქნება საჭირო.
2355 თავშესაფარში უკვე დაფიქსირებულია კორონავირუსის შემთხვევები, თითოეულ თავშესაფარში საშუალოდ 130 მცხოვრებია (ხანდაზმულებისა და დასაქმებული პერსონალის, მომვლელების ჩათვლით). ზემოთ ხსენებული წესით თავშესაფრების შესამოწმებლად სკრინინგისთვის მინიმუმ 306 150 ტესტია საჭირო, ჯერჯერობით კი, საფრანგეთს ყოველდღიურად მხოლოდ 20-30 ათასი ტესტირების ჩატარების შესაძლებლობა აქვს. ყოველდღიურ სკრინინგში ვერ მოიაზრებენ მხოლოდ ხანდაზმულებს, ტესტირება უტარდებათ ჰოსპიტალიზებულ პაციენტებს, მედპერსონალს და ორსულებს. შესაბამისად, ქვეყნის ჯანდაცვის მინისტრის განმარტებით, მოხუცთა თავშესაფრების მასობრივ შემოწმებას საფრანგეთში რამდენიმე კვირა მაინც დასჭირდება.
