7 მლნ ლარს გადააჭარბა კარანტინის წესების დარღვევისთვის გამოწერილმა ჯარიმებმა

ქვეყანაში საგანგებო მდგომარეობით გამოწვეული შეზღუდვების დარღვევის გამო გამოწერილმა ჯარიმებმა 7 მილიონ ლარს გადააჭარბა. ეს კომენდანტის საათის დარღვევის, ასევე, სამზე მეტი პირის შეკრებასთან დაკავშირებული შეზღუდვის, მგზავრთა გადაყვანის, ეკონომიკური საქმიანობის განხორციელებისა და კარანტინით გათვალისწინებული სხვა შეზღუდვების დარღვევისთვის გამოწერილი ჯარიმებია.

ჯერჯერობით ვერ დავახარისხეთ, რამდენი ფიზიკური და რამდენი იურიდიული პირი დააჯარიმეს, ამიტომაც საერთო ციფრი ჯარიმის მინიმალური ოდენობის – 3000 ლარის მიხედვით გამოვთვალეთ. შესაბამისად, ჯარიმების საერთო ოდენობა სინამდვილეში ბევრად მეტია.

საქართველოს მთავრობამ კორონავირუსის პრევენციის მიზნით კარანტინი მთელი ქვეყნის მასშტაბით 2020 წლის 30 მარტს გამოაცხადა. ათვლა 31 მარტს დილის ექვსი საათიდან დაიწყო, ხოლო კარანტინის ფარგლებში დაწესებული კომენდანტის საათი 31 მარტს საღამოს ცხრა საათიდან ამოქმედდა, ამ დროიდან დილის ექვს საათამდე მოქალაქეებს ქუჩაში გამოსვლა აეკრძალათ.

31 მარტიდან დღემდე შინაგან საქმეთა სამინისტრო თავის ვებგვერდზე ყოველდღიურად აქვეყნებს გამოვლენილი დარღვევებისა და დაჯარიმების სტატისტიკას, „ბათუმელებმა“ ეს ციფრები დააჯამა 31 მარტიდან დღემდე, რვა აპრილამდე.

შსს-ს მონაცემებით, 31 მარტიდან დღემდე სამართალდამცველებმა, მთელი ქვეყნის მასშტაბით, საგანგებო მდგომარეობის რეჟიმის დარღვევის 2 528 ფაქტი გამოავლინეს.

მათ შორის, კომენდანტის საათის დარღვევისთვის დააჯარიმეს 1093 მოქალაქე. ფიზიკური პირისთვის ჯარიმა 3000 ლარია. უკვე დაკისრებული სანქციების მიხედვით დაჯარიმებულმა პირებმა ბიუჯეტის სასარგებლოდ ჯამში 3 მილიონ 279 000 ლარი უნდა გადაიხადონ.

ამას ემატება 972 000 ლარი – ამ თანხით პოლიციამ ის მოქალაქეები დააჯარიმა, რომლებმაც ათზე მეტი პირის შეკრებასთან დაკავშირებული აკრძალვა დაარღვიეს [საჯარო სივრცეში 10-ზე მეტი პირის შეკრების გამო პოლიციამ ამ დრომდე 324 მოქალაქე დააჯარიმა 3000 ლარით].

მგზავრთა გადაყვანისა და ავტომობილით გადაადგილების წესის დარღვევის ფაქტზე სამართალდამცველებმა 1083 პირი დააჯარიმეს. ამ ბოლო ორი მონაცემის შემთხვევაში [ათზე მეტი პირის შეკრება და მგზავრთა გადაყვანა] არ გვაქვს ზუსტი ინფორმაცია, მათ შორის რამდენია ფიზიკური და რამდენია იურიდიული პირი.

ჯარიმა ფიზიკური პირისთვის 3000 ლარი, ხოლო იურიდიული პირისთვის 12 000 ლარია. ასეთი ჯარიმა საგანგებო მდგომარეობის გამოცხადების შემდეგ, ეკონომიკურ საქმიანობასთან დაკავშირებული შეზღუდვების დარღვევის ფაქტზე დაეკისრა შვიდ კომპანიას [იურიდიულ პირს] ჯარიმამ საერთო ჯამში 105 000 ლარი შეადგინა. ამავე მიზეზით რვა ფიზიკური პირიც დააჯარიმეს.

კარანტინის გამოცხადებიდან ამ დრომდე თვითიზოლაციის წესი დაარღვია 57-მა მოქალაქემ. ამ შემთხვევაში თანხა საერთო ჯამში 171 000 ლარია.

„ამ შემთხვევაში ჯარიმის აღსრულების პროცედურა აითვლება საგანგებო მდგომარეობის დასრულების შემდეგ, რადგან მანამდე გასაჩივრების მოქმედების ვადა შეჩერებულია,“ – განმარტავს პაატა დიასამიძე, „ახალგაზრდა იურისტთა ასოციაციის“ აჭარის ფილიალის ხელმძღვანელი.

______

ამავე თემაზე