მთავარი,სიახლეები

ნაგვის პარკები თავზე – რას ჰყვება ექიმი, რომელიც კორონავირუსით ინფიცირებულებს მკურნალობს – BBC

07.04.2020 • 3903
ნაგვის პარკები თავზე – რას ჰყვება ექიმი, რომელიც კორონავირუსით ინფიცირებულებს მკურნალობს – BBC

ბრიტანეთში კორონავირუსის ინფექციით გარდაცვლილთა რიცხვი იზრდება. საავადმყოფოები უწყვეტ რეჟიმში მუშაობენ და ცდილობენ მოაწყონ შესაბამისად აღჭურვილი გარემო ინტენსიური თერაპიის განყოფილებაში მყოფი კრიტიკული პაციენტებისთვის. ექიმი რეანიმატოლოგი  BBC-სთან საუბრისას  მედპერსონალის, აღჭურვილობისა და მედიკამენტების  დეფიციტზე საუბრობს ანონიმურად, რადგან კლინიკაში საჯარო განცხადებების გაკეთება  ეკრძალებათ.

ექიმი რობერტსი [სახელი შეცვლილია] აღწერს საავადმყოფოს, სადაც კორონავირუსით ინფიცირებული პაციენტებითაა სავსე ინტენსიური თერაპიის განყოფილება. გადადებულია ყველა გეგმიური ოპერაცია ონკოლოგიურ განყოფილებაშიც კი. არ არის პერსონალის საკმარისი რაოდენობა, არასაკმარისია საწოლები, ანტიბიოტიკები და სასუნთქი აპარატები.

დიდი ბრიტანეთის საავადმყოფოებში ეს მდგომარეობა პანდემიის პიკამდე შეიქმნა, პიკს კი ქვეყანაში აპრილის შუა რიცხვებში ელოდებიან. მედპერსონალი უკვე გრძნობს ამ მდგომარეობის მოსალოდნელ სირთულეებს.

როგორც ექიმი რობერტსი ჰყვება, მედპერსონალი, რომელიც 13-საათიან, უწყვეტ სამუშაო რეჟიმში უვლის პაციენტებს, იძულებულია  ვირუსისგან დაცვის აღჭურვლობა თავად დაამზადოს ნაგვის პარკების, ცელოფნის წინსაფრებისა და მოთხილამურეების სათვალეებისგან. 2-მეტრიანი აუცილებელი სოციალური დისტანცირების მოწოდების პირობებში, ექიმებს ბრიტანეთში პაციენტებთან 20 სანტიმეტრის დისტანციაზე უწევთ კონტაქტი მკურნალობისას, აუცილებელი აღჭურვილობის გარეშე.

ექიმი რობერტსის განყოფილებაში საავადმყოფოს თანამშრომლები დაცვის საშუალებებს თავად ამზადებენ.

„საღად უნდა ვიაზროვნოთ. ინტენსიური თერაპიის პალატის მედდები ატარებენ პროცედურებს, რის შემდეგაც შესაძლოა თავად იქცნენ ვირუსის გამავრცელებლებად. მათ ურჩევენ, გამოიყენონ ჩვეულებრივი ქირურგიული ქუდები, რომლებიც ნახვრეტებიანია და სინამდვილეში არ გიცავს. ეს არასწორია. გვიწევს თავი დავიცვათ ნაგვის პარკებითა და ცელოფნის წინსაფრებით,“- ამბობს ექიმი.

ბრიტანეთის ხელისუფლებაირწმუნება, რომ მომარაგების ეროვნული გუნდი ჯარის დახმარებით დღე-ღამის განმავლობაში მუშაობს აუცილებელი აღჭურვილობებით კლინიკების მოსამარაგებლად.

ჯანდაცვის ეროვნულმა სამსახურმა BBC-ს ასევე აცნობა, რომ პირველ აპრილს  მილიონი რესპირატორი იყო მიღებული, თუმცა არ იყვნენ ინფორმირებულები, რომ სპეციალური ქუდებისა და გრძელმკლავიანი აღჭურვილობის ამგვარი საჭიროება იყო.

ექიმი რობერტსი ამბობს, რომ მის საავადმყოფოს სახელმწიფოსგან არაფერი მიუღია  და ის დამცავი საშუალებებიც, რითაც სარგებლობენ, საეჭვოა:

„დამცავ, რესპირატორულ ნიღბებზე, რითაც ახლა ვსარგებლობთ, შეცვლილი იყო ვარგისიანობის ვადის აღმნიშვნელი ეტიკეტი.

გუშინ ერთი რესპირატორი ვიპოვე, სამი ერთმანეთზე დაკრული იარლიყით. პირველ იარლიყზე ვარგისიანობის ვადა 2009 წლამდე იყო, მეორეზე – 2013-მდე, მესამე იარლიყზე რესპირატორს ვადა 2021 წლამდე ჰქონდა,“ – ამბობს ექიმი.

ფოტო BBC/ექიმი რობერტსი BBC-ის კორესპონდენტს აჩვენებს ნიღბებზე დაკრულ რამდენიმე სხვადასხვა სტიკერს, რომლებზეც ნიღბების ვარგისიანობის სხვადასხვა ვადაა მითითებული

ინგლისის საზოგადოებრივი ჯანდაცვის სამსახური აცხადებს, რომ ნიღბები, გამოყენების ვადის სხვადასხვა თარიღის მიუხედავად, ვარგისია და შემოწმებული, რაც საეჭვოა ექიმი რობერტსისთვის. მის კლინიკაში სამი ექიმი დაინფიცირდა კორონავირუსით.

ერთ-ერთ მათგანს, ექიმ რეანიმატოლოგს, შესაბამისი დამცავი სამოსი არ ჰქონდა.

პაციენტების ნათესავებს საავადმყოფოში არ უშვებენ.

„ყველაზე რთული მომენტი დგება, როცა გვიწევს დავურეკოთ კრიტიკული პაციენტის ახლობლებს. ვეუბნებით, რომ მათი ნათესავი კვდება და აპარატს ვთიშავთ, მაგრამ ვერ ვრთავთ მათი მონახულების და გამომშვიდობების ნებას. სხვა დროს, ჩვეულებრივ, პაციენტების ახლობლებს ვეუბნებით, რომ ,,ყველაფერს ვიზამთ, რაც შეგვიძლია“, ბოლო დროს ვგრძნობ, ამის თქმა აღარ გამოვა. ეს იქნება სიმართლე: მე არ შემიძლია ყველას მივცე ვენტილაციის აპარატი, ვისაც სჭირდება, ვეღარც მედდის დახმარების იმედს ვაძლევ ვერავის – ისინი უკვე შესაძლებლობების ზღვარზე არიან. გვეწურება ანტიბიოტიკების მარაგიც და ვერ მივცემთ ვერავის გარანტიას, რომ ჩაუტარდებათ აუცილებელი პროცედურები, რაც მათ დაეხმარებოდა,“ – ამბობს ექიმი.

საპასუხოდ, ინგლისის ეროვნული ჯანდაცვის სამსახურში ამბობენ, რომ არ აქვთ ზუსტი მონაცემები, თუ რამდენი ექიმი დაინფიცირდა კორონავირუსით უშუალოდ სამუშაო ადგილზე და რამდენი გაფორმდა პაციენტად.

როგორც ექიმი რობერტსი ამბობს, მედპერსონალი პანდემიის პიკს ქვეყანაში, იტალიისა და ესპანეთის მაგალითის გათვალისწინებით, დაახლოებით 2 კვირაში ელოდება. მისივე თქმით, თუ ამ პერიოდში ბრიტანეთშიც იმ ტემპით იმატა ინფიცირებულთა რაოდენობამ, როგორც ესპანეთსა და იტალიაში, ქვეყანაში ჯანდაცვის სისტემა გადაიტვირთება.

„ჩვენს დაწესებულებებში პაციენტებისთვის ადგილი მალე აღარ იქნება. ყველა ჩვენი ნარკოზული ანესთეზიის აპარატი, რომელიც მაქსიმუმ 2-3 საათს უნდა მუშაობდეს, გამოურთავად მუშაობს 5 დღის განმავლობაში,“ – ამბობს ექიმი.

რეანიმაციაში დამატებით საწოლებს საოპერაციოებიდან და სხვადასხვა განყოფილებიდან ამატებენ, ეს საშუალებას იძლევა გაორმაგდეს ადგილები კრიტიკული პაციენტების ნაკადის ზრდისას, განსაკუთრებით მათთვის, ვისაც დამოუკიდებლად აღარ შეუძლიათ სუნთქვა და ვენტილაციის აპარატი სჭირდებათ. თუმცა საწოლების გაორმაგებული რაოდენობის მიუხედავად საავადმყოფოებში მომზადებული მედპერსონალის რიცხვი იგივეა, რაც იყო.

როგორც ექიმი ამბობს, რეანიმაციის მედდები მაღალკვალიფიციური პერსონალია, ისინი ინდივიდუალურ მეთვალყურეობას უწევენ კრიტიკულ მდგომარეობაში მყოფ თითოეულ პაციენტს.

„მედდებმა საკუთარი პაციენტების სრული სურათი იციან, თმის ყველა ღერი, ახლა კი საწოლების გაორმაგების პირობებში უწევთ ერთდროულად 4 პაციენტის ინდივიდუალურად მეთვალყურეობა, თან ისე, როგორც ერთს უმკურნალებდნენ. ტირიან. მათთვის ეს ძალიან რთულია. ჩვენი განყოფილების ყველაზე მნიშვნელოვანი ადამიანები მედდები არიან, სწორედ მათზეა მთელი დატვირთვა, რასაც ვეღარ უძლებენ,“- ამბობს ექიმი რობერტსი.

მისი მონათხრობის მიხედვით, ტერიტორიაზე, სადაც პანდემიამდე სასწრაფო სამედიცინო მანქანების პარკი იყო, ახლა პაციენტთა მიმღები განყოფილებაა მოწყობილი, სადაც არკვევენ ნამდვილად კორონავირუსის სიმპტომები აქვს თუ არა კლინიკაში მოსულს, სანამ მას საავადმყოფოში შეუშვებენ. ამ „განყოფილებას“ ექიმი მეთვალყურეობს, რომელიც, წესით, ინფიცირებულებს უნდა მკურნალობდეს. ექიმი რობერტსი საავადმყოფოს ამ ნაწილს „სიცრუის დეტექტორს“ უწოდებს:

„ხშირად ადამიანები სიმპტომებს აბუქებენ, რომ უბრალოდ ექიმმა გასინჯოს. ისინი, ვინც სახლში უნდა ისხდნენ, გადაუდებელი დახმარების განყოფილებში მოდიან.

თვითიზოლაცია უმნიშვნელოვანესია. ჩვენი საავადმყოფოს მედპერსონალი არასამუშაო დროს თვითიზოლირდება, რადგან მომატებული რისკის ქვეშ ვართ და შეიძლება ვიქცეთ ინფექციის გადამტანებად.

ძალიან საწყენია ახლა ხალხით სავსე პარკების დანახვა, სავსე მაღაზიები, ისე, თითქოს არაფერი ხდებოდეს. გთხოვთ, დარჩით სახლში!“ – ამბობს ბრიტანელი ექიმი.

7 აპრილის მონაცემებით, დიდ ბრიტანეთში Covid 19-ით გარდაცვლილია 5 373 ადამიანი, ინფიცირებულთა რიცხვი კი 52 ათასს აჭარბებს.


მთავარ ფოტოზე: ბრიტანელი ექიმები ნაგვის პარკების თავსაბურავებით/BBC

გადაბეჭდვის წესი


ასევე: