მთავარი,სიახლეები

სამუშაოს განახლებას ასობით კომპანია ითხოვს

06.04.2020 • 2143
სამუშაოს განახლებას ასობით კომპანია ითხოვს

საქართველოს ეკონომიკისა და მდგრადი განვითარების მინისტრის, ნათია თურნავას ინფორმაციით, სპეციალური აპლიკაცია, რომლის დახმარებითაც კომპანიებმა საგანგებო ვითარების პერიოდში მუშაობის გაგრძელების უფლება უნდა მოიპოვონ,  რამდენიმე ასეულმა კომპანიამ უკვე შეავსო და სპეციალურ მისამართზე გადააგზავნა. მინისტრის თქმით, განსაკუთრებით სამშენებლო, ასევე საშენ მასალათა მწარმოებელი კომპანიები აქტიურობენ.

სპეციალური აპლიკაციები სამინიტროს ვებგვერდზე პარასკევს, 3 აპრილს, აიტვირთა.  მინისტრის განცხადებით,  გადამოწმებას, თუ რამდენად აკმაყოფილებენ კომპანიები სტანდარტით გათვალისწინებულ მოთხოვნებს, სამინისტროს ტექნიკური ზედამხედველობის სამსახური, სხვა შესაბამის მუნიციპალურ  სამსახურებთან ერთად, დღეიდან [6 აპრილს] დაიწყებს.

ზედამხედველობის სამსახურები შემოწმებას დაიწყებენ იმ საწარმოებიდან, რომლებსაც მუშაობის ნებართვა უკვე აქვთ. კომპანიებს უსაფრთხოების სტანდარტები ჯანდაცვის სამინისტროს რეკომენდაციების შესაბამისად სრულად უნდა ჰქონდეთ დაკმაყოფილებული.

კონკრეტული მიმართულებების მიხედვით კორონავირუსის პრევენციის მიზნით დეტალური რეკომენდაციები საქართველოს ჯანდაცვის სამინისტრომ მოამზადა.

მინისტრი ნათია თურნავა ვარაუდობს, რომ დღეში დაახლოებით 50 საწარმოს შემოწმება მოხერხდება.

პარალელურად დაიწყება იმ ბიზნესების საქმიანობის შესწავლა, რომლებსაც საქმიანობის გაგრძელების უფლება შეზღუდული აქვთ და გაგრძელებას შესაბამისი აპლიკაციით ითხოვენ.

მინისტრმა დღეს მოუწოდა კომპანიებს, რომ გაიღონ ინვესტიცია, რომლითაც ისინი უზრუნველყოფენ უსაფრთხოების სტანდარტების მოთხოვნების დაკმაყოფილებას: ეს არის ინვესტიცია, რომელიც არ დაგეკარგებათ, რადგან ეს იქცევა ცხოვრების წესად,“ – განაცხადა მინისტრმა.

ხარვეზების გამოვლენის შემთხვევაში საწარმოებში დასაქმებულებს ექნებათ ასევე საშუალება, ცხელ ხაზზე დაუკავშირდნენ მთავრობას და შეატყობინონ ხარვეზის შესახებ.

საგანგებო მდგომარეობის პერიოდში მუშაობის გაგრძელების ნებართვის მოსაპოვებლად კომპანიებმა, რომლებსაც ამ დროისთვის საქართველოს მთავრობის დადგენილებით შეზღუდული აქვთ საქმიანობის განხორციელების უფლება,  საქართველოს ეკონომიკისა და მდგრადი განვითარების სამინისტროს ოფიციალური ვებგვერდიდან –  www.economy.ge  უნდა  ჩამოტვირთონ სარეგისტრაციო ფორმა, შეავსონ და გაგზავნონ ელექტრონული ფოსტის მისამართზე – construction@moesd.gov.ge.

როგორ შეიძლება მოიპოვოს კომპანიამ მუშაობის გაგრძელების უფლება – მინისტრის განმარტება

გადაბეჭდვის წესი


ასევე: