Batumelebi | „მოვა უკეთესი დღეები“ – ელიზაბეტ II ბრიტანელებს სიმტიკიცისკენ მოუწოდებს „მოვა უკეთესი დღეები“ – ელიზაბეტ II ბრიტანელებს სიმტიკიცისკენ მოუწოდებს – Batumelebi

„მოვა უკეთესი დღეები“ – ელიზაბეტ II ბრიტანელებს სიმტიკიცისკენ მოუწოდებს

ინგლისის დედოფალმა ელიზაბეტ მეორემ ბრიტანელებს მიმართა 5 აპრილს, კვირას.

დედოფალმა მადლობა გადაუხადა ჯანდაცვის და სხვა სამსახურების წარმომადგენლებს და ხაზი გაუსვა საზოგადოების ყველა წევრის მნიშვნელოვან როლს კორონავირუსთან ბრძოლაში.

„მე მოგმართავთ თქვენ ძალიან რთულ დროს, როცა ჩვენს ქვეყანაში ნორმალური ცხოვრება შეფერხდა, ვიღაცისთვის ამან უკვე მწუხარება მოიტანა, ბევრისთვის ფინანსური სირთულეები და ჩვენ ყველას შეგვეხო კოლოსალური ცვლილებები.

ვიმედოვნებ, რომ მომავალში ყველა შეძლებს იამაყოს, როგორ შევხვდით ერთად ამ სირთულეებს, ხოლო ისინი, ვინც მოვლენ ჩვენს შემდეგ, იტყვიან, რომ ბრიტანელების ეს თაობა არის ისეთივე ძლიერი, როგორც იყვნენ წინა თაობები.

ისეთი თვისებები, როგორიცაა თვითდისციპლინა, მშვიდი გადაწყვეტილებები და თანაგრძნობა, კვლავინდებურად მნიშვნელოვანია ჩვენს ქვეყანაში“ – განაცხადა ელიზაბეტ მეორემ.

დედოფალმა, ასევე, მადლობა გადაუხადა ბრიტანელებს, რომლებმაც კარგი ამინდის მიუხედავად გაითვალისწინეს მთავრობის რეკომენდაცია და დარჩნენ სახლში.

„ჩვენ ადრეც დაგვიძლევია სირთულეები, მაგრამ ამჯერად არის ერთი განსხვავება – ახლა ჩვენ გავაერთიანეთ ძალისხმევა პლანეტის ყველა ქვეყანასთან, ვიყენებთ მეცნიერების უდიდეს მიღწევებსა და ჩვენს ბუნებრივ, თანაგრძნობის უნარს განკურნებისთვის. ჩვენ მივაღწევთ წარმატებას და ეს წარმატება იქნება ყველა ჩვენგანის კუთვნილება.

თავი უნდა დავიმშვიდოთ იმით, რომ მიუხედავად იმისა, რომ არაერთი სირთულე გველის, მოვა უკეთესი დღეები. ჩვენ ისევ ვიქნებით ჩვენს მეგობრებთან, ნათესავებთან ერთად, ჩვენ ისევ შევხვდებით“ – განაცხადა ელიზაბეტ მეორემ.

გაერთიანებულ სამეფოში კორონავირუსის 48 406 შემთხვევაა დადასტურებული. COVID-19-ისგან გარდაიცვალა 4 943 ადამიანი, გამოჯანმრთელდა – 229.

________________

ფოტო: ევროპის პრესფოტო სააგენტო. EPA

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com