ბოლო 24 საათში აჭარაში კორონავირუსის ახალი შემთხვევები არ გამოვლენილა. დღეს, 4აპრილს, აჭარის ჯანდაცვის მინისტრის მოადგილემ, ნინო ნიჟარაძემ გააცნო ჟურნალისტებს რეგიონში მიმდინარე სიტუაცია.
მისი განცხადებით, „მედალფაში“კორონავირუსზე მკურნალობას აგრძელებს შვიდი პაციენტი, რომელთაგანაც ერთის მდგომარეობა რჩება სტაბილურად მძიმე, დანარჩენი 6 პაციენტის მდგომარეობა კი არის საშუალო და მსუბუქი სიმძიმის.
„24 საათის განმავლობაში ბათუმის ინფექციურ საავადმყოფოში გატარდა 36 პაციენტი, ესენი იყვნენ როგორც თვითდინებით შესული, ასევე საკარანტინე ზონიდან და ონლაინ კლინიკიდან გადამისამართებული პირები. 33 შემთხვევაში მივიღეთ უარყოფითი პასუხი, სამი შესაძლო შემთხვევა ახლა არის ლაბორატორიული კვლევის ფაზაში“ – განაცხადა ნინო ნიჟარაძემ.
მისივე თქმით, რაც შეეხება ონლაინ კლინიკებს, 112-იდან ხდება ზარების გადამისამართება პირველადი ჯანდაცვის დატრენინგებულ ექიმებთან. ორი დღის განმავლობაში ონლაინ კლინიკაში 42 ზარი შევიდა და მათგან 4 პირი იქნა გადამისამართებული ცხელების ცენტრში.
აჭარაში საკარანტინე ზონაში იმყოფება 2 000 პირი, თვითიზოლაციაში კი ასამდე ადამიანია.
4 აპრილის მონაცემებით [11 სთ] ახალი კორონავირუსის შემთვევების რაოდენობა საქართველოში 156-ია, მათგან 28 პაციენტი გამოჯანმრთელდა. შესაბამისად, ოფიციალური სტატისტიკის მიხედვით, 128 ადამიანი გადის მკურნალობას.
