Batumelebi | მსოფლიოში COVID19-ით დაინფიცირების შემთხვევები მილიონს უახლოვდება მსოფლიოში COVID19-ით დაინფიცირების შემთხვევები მილიონს უახლოვდება – Batumelebi

მსოფლიოში COVID19-ით დაინფიცირების შემთხვევები მილიონს უახლოვდება

მას შემდეგ, რაც ვირუსის სწრაფი გავრცელების გამო გასულ კვირაში დადასტურებული შემთხვევების რაოდენობა გაორმაგდა, Covid-19-ით ინფიცირების მაჩვენებელი მსოფლიოში მილიონს უახლოვდება.

ჯანდაცვის მსოფლიო ორგანიზაციის ხელმძღვანელმა, ტედროს ადანომ გებრეისუსმა, გუშინ საღამოს გამართულ ონლაინპრესკონფერენციაზე თქვა: „ჩვენ შევედით COVID-19 პანდემიის დაწყებიდან მეოთხე თვეში და მე ძალიან შეშფოთებული ვარ ინფექციის ასეთი სწრაფი ესკალაციით და გლობალური გავრცელებით. ბოლო 5 კვირის განმავლობაში ჩვენ მომსწრენი გავხდით ახალი შემთხვევების რიცხვის ექსპონენციური (ზვავისმაგვარი) ზრდისა, რაც გასწვდა თითქმის ყველა ქვეყანას, ტერიტორიას და არეს. ბოლო ერთი კვირის განმავლობაში დაღუპულთა რიცხვი გაორმაგდა. უახლოეს დღეებში ჩვენ მივაღწევთ 1 მილიონამდე დადასტურებულ შემთხვევას და 50 ათას გარდაცვალებას“.

ჯონ ჰოპკინსის სამედიცინო უნივერსიტეტის ოფიციალური მონაცემებით, ამ წუთებში ვირუსის დადასტურებული შემთხვევების რაოდენობა მსოფლიოში 939 436-ია, ვირუსით გარდაცვლილი ადამიანების რაოდენობა კი – 47 287.

ინფიცირებულთა ყველაზე დიდი რაოდენობა აშშ-შია -216 722,, გარდაცვლილთა რაოდენობა კი 5000-ს გასცდა.

CNN-ი წერს, რომ გადაუდებელი სამედიცინო დახმარების სამედიცინო ინვენტარის ფედერალური მარაგი თითქმის ამოწურულია, რადგან საავადმყოფოებს მილიონზე მეტი ნიღაბი და დამცავი მოწყობილობა სჭირდება.

2 აპრილს საქართველოში კორონავირუსით დაინფიცირების კიდევ 13 შემთხვევა დადასტურდა. ამ დროისთვის კორონავირუსის დადასტურებული შემთხვევაა – 130, მათ შორის გამოჯანმრთელებულია – 26, კარანტინის რეჟიმშია – 5 550, ხოლო სტაციონარში მეთვალყურეობის ქვეშ იმყოფება 281 ადამიანი.

მსოფლიოში ახალი კორონავირუსისგან გამოჯანმრთელებულთა საერთო რაოდენობა 195 929 – ია.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან