ინფექციური საავადმყოფოს სამედიცინო დირექტორი მარინა ეზუგბაია ამბობს, რომ მორწმუნეა და პატრიარქის კურთხევის მიხედვით იმოქმედებს. მარინა ეზუგბაია დღეს, პირველ აპრილს, ტელეკომპანია “პირველზე” ჟურნალისტ თამარ ჩიხლაძის საავტორო გადაცემა “ღამის ამბებში” იყო მიწვეული. ჟურნალისტმა მას კითხვა საპატრიარქოსთან დაკავშირებით დაუსვა. კერძოდ, ჰკითხა, “მთავრობა ჯერჯერობით ვერ ამბობს, სამ კაცზე მეტის შეკრების აკრძალვა ეხება თუ არა ყველას. თქვენ ბრძანდებით ექიმი, მაინტერესებს რეკომენდაცია “დარჩი სახლში” უნდა შეეხოს თუ არა ყველას, მათ შორის მრევლსაც?
“მე მორწმუნე ვარ, მართლმადიდებელი მორწმუნე. მრავალი წელია ეკლესიაში დავდივარ. ვესწრები თითქმის ყველა ლოცვას. სახელმწიფო და საპატრიარქო რა გადაწყვეტილებას მიიღებენ, უკვე მიღებული აქვთ. მაგრამ პატრიარქის კურთხევა როგორიც იქნება, მე, როგორც მორწმუნე ადამიანი, ალბათ მას შევასრულებ,” – უპასუხა მარინა ეზუგბაიამ.
როგორც ექიმი, ქალბატონო მარინა? თქვენი რეკომენდაცია განსხვავებულია მრევლისთვის და სხვებისთვის? ჰკითხა ჟურნალისტმა თამარ ჩიხლაძემ მარინა ეზუგბაიას.
“იცით, რა არის? მრევლისთვის და ყველასთვის. იცით რაშია, ყველაფერი უფლის ნებაა ამ ქვეყანაზე მეტ-ნაკლებად. თუ ჩვენ დავიცავთ, თუ მორწმუნე ადამიანს, რომელსაც სურვილი აქვს, რომ ტაძარში მივიდეს და სააღდგომო ლიტურგიას, აქ საუბარია სააღდგომო ლიტურგიაზე დასწრებაზე, თუ დაიცვება ყველა ის წესი, რომელიც მოწოდებულია, ეპიდემიოლოგიური თვალსაზრისით, ამ შემთხვევაში ალბათ შესაძლებელი იქნება სააღდგომო ლიტურგიაზე დასწრება,” – თქვა მარინა ეზუგბაიამ.
საქართველოში კორონავირუსით 1-ელი აპრილის მონაცემებით 117 ადამიანია ინფიცირებული. მათგან 21 უკვე გამოჯანმრთელდა.
