პირველი აპრილის მონაცემებით [21 სთ] მსოფლიოში კორონავირუსით ინფიცირების 887 067 შემთხვევაა დაფიქსირებული. თითქმის 44 264 ადამიანი გარდაიცვალა. სტატისტიკა ყოველდღიურად იცვლება. ინფიცირებისა და სიკვდილიანობის დაღმავალი დინამიკა ჯერ არცერთ ქვეყანას არ აქვს.
პირველი აპრილის მონაცემებით საფრანგეთში კორონავირუსით გარდაცვლილია 3 523 ადამიანი, რამაც უკვე გადააჭარბა ჩინეთში ვირუსით სიკვდილიანობის სტატისტიკას, სადაც 3 193 ინფიცირებული გარდაიცვალა.
ინფიცირებულთა რიცხვი საფრანგეთში ამჯერად 52 870-ია. ქვეყანაში ინფექციამ ელზასის რეგიონში იფეთქა, სადაც საველე ჰოსპიტლები მოეწყო, მთელ საფრანგეთში მავალი სწრაფმავალი მატარებელი TGV კი პანდემიის პირობებში სასწრაფო დახმარების ვაგონებად გადაკეთდა მძიმე პაციენტთა დროულად გადასაყვანად.
საფრანგეთის პრეზიდენტმა ემანუელ მაკრონმა ქვეყანაში საგანგებო მდგომარეობის გამოცხადების შემდეგ კორონავირუსის პანდემიას „ღია ომი“ უწოდა, რომელშიც მთელ მსოფლიოს ერთად მოუწევს ბრძოლა.
მსოფლიო ჯანდაცვის ორგანიზაციის ბოლო მონაცემებით კორონავირუსით გარდაცვლილთა რაოდენობა ყველაზე მეტია იტალიაში [12 430], ესპანეთში [8 189], საფრანგეთში [3 523], ჩინეთსა [3 321] და ირანში [2 898].
