სპეციალური ჩარტერული რეისით ბულგარეთიდან, კერძოდ, ქალაქ ბურგასიდან საქართველოში ჩამოიყვანენ ქართული გადამზიდავი კომპანიების მძღოლებს, რომლებსაც ბულგარეთის მხარემ, ქვეყანაში არსებული საკარანტინო შეზღუდვის [COVID-19] გამო, ბორანზე ასვლისა და საკუთარ ავტომობილებთან ერთად გამომგზავრების უფლება არ მისცა.
სახმელეთო ტრანსპორტის სააგენტოს ინფორმაციით, ბულგარეთიდან ჩარტერით ჩამოსული პირები 14-დღიან სავალდებულო კარანტინს საქართველოში გაივლიან.
ავიამომსახურებაზე შესაბამისი ხელშეკრულება [რეისი: თბილისი-ბურგასი-თბილისი] სააგენტოსა და შპს „მაივეი ეარლაინს კო ლტდ“-ს შორის უკვე გაფორმებულია. მომსახურების საორიენტაციო ღირებულება არის 21 800 ევრო.
დოკუმენტების მიხედვით, რეისის ღირებულება ავიაკომპანიის მიერაა განსაზღვრული. თუმცა, „ხელშეკრულების საორიენტაციო ღირებულებას გამოაკლდება იმ გაყიდული ბილეთების ჯამური ღირებულება, რომელთა ანაზღაურებასაც მოახდენენ კერძო კომპანიები ან/და ფიზიკური პირები (არსებობის შემთხვევაში). გაყიდული ბილეთების შესახებ ინფორმაციას მიმწოდებელი მიაწვდის შემსყიდველს რეისის დასრულების შემდეგ.“
„ბათუმელებმა“ სახმელეთო ტრანსპორტის სააგენტოს ჰკითხა, რამდენ მძღოლს გადმოიყვანენ და ასევე, ხომ არ იგეგმება სხვა მოქალაქეების გადმოყვან ამავე რეისით. სააგენტოდან პასუხი ჯერჯერობით ვერ მივიღეთ.
რეისი დაგეგმილია ხვალ, 1-ელ აპრილს.
