დღეს, 31 მარტს, ისევ მძიმეა ბათუმში, კლინიკა „მედალფაში“ მყოფი პაციენტის მდგომარეობა, რომელიც მართვით სუნთქვაზე იმყოფება. მას ორმხრივი პნევმონია აქვს. ინფორმაცია ამის შესახებ „ბათუმელებს“ „მედალფას“ აჭარა-გურიის რეგიონალურმა დირექტორმა, ლევან ანთაძემ დაუდასტურა.
მისივე ინფორმაციით, შედარებით მძიმეა კიდევ ერთი პაციენტის მდგომარეობა, რომელსაც ასევე ორმხრივი პნევმონია აქვს.
ამ დროისთვის ბათუმში, „მედალფას“ კლინიკაში, COVID-19-ის დადასტურებული დიაგნოზით რვა პაციენტი მკურნალობს. დანარჩენი ექვსის მდგომარეობა მსუბუქია და ლევან ანთაძის თქმით, მათ შორის რამდენიმეს არ აღენიშნება ვირუსის არანაირი სიმპტომი.
„მედალფაში“ მკურნალობენ ასევე ბათუმელ მედდას, რომელიც პაციენტთან ურთიერთობის დროს დაინფიცირდა. მან თავის თავზე აიღო რთულ პაციენტთან მუშაობა.
31 მარტის მონაცემებით, საქართველოში კორონავირუსის 108 დადასტურებული შემთხვევაა. მათ შორის გამოჯანმრთელებულია 20 ადამიანი.
კარანტინის რეჟიმში იმყოფება 4995 ადამიანი, სტაციონარში მეთვალყურეობის ქვეშ კი – 278 ადამიანი.
დღეს, საღამოს 21:00 საათიდან, ქვეყანაში კომენდანტის საათი ამოქმედდება. გადაადგილების უფლება მხოლოდ სპეციალური საშვის მქონე პირებს ექნებათ.
ამავე თემაზე:
რა იკრძალება 31 მარტიდან საქართველოში – კარანტინი და კომენდანტის საათი
