22 დეკემბრის მონაცემებით, საქართველოში კორონავირუსის ახალი შტამის – ომიკრონის 24 შემთხვევა დაფიქსირდა.
საქართველოს დაავადებათა კონტროლის ეროვნული ცენტრის ხელმძღვანელის ამირან გამყრელიძის ინფორმაციით, პირველი ორი ადამიანი, რომელთაც ომიკრონი ორშაბათს დაუდასტურდა, 24 და 26 წლის ახალგაზრდები არიან. მათ საზღვარგარეთ მოგზაურობის ისტორია აქვთ – ერთს აშშ-ში, მეორეს კი – დუბაიში.
„მათ ჰქონდათ საკმაოდ ბევრი კონტაქტი და ამ კონტაქტებიდან დავადასტურეთ კიდევ 22 შემთხვევა. მათგან ზოგიერთი კონტაქტია, მაგრამ ამავე დროს არის დამოუკიდებელი შემთხვევებიც და თითქმის ყველა არის შემოტანილი.
9 შემთხვევა შემოტანილია დუბაიდან, ერთი – თვითმფრინავით. ერთი შემთხვევა შემოსულია ბუდაპეშტიდან, ერთი შემთხვევა არის ლონდონიდან, ორი შემთხვევა გახლავთ თურქეთის გავლით, აფრიკის ქვეყნებიდან, ასევე, ერთი შემთხვევა არის აშშ – დან” – განაცხადა დღეს, 22 დეკემბერს, ამირან გამყრელიძემ.
მისივე თქმით, პაციენტებს აღენიშნებათ ტემპერატურის მცირე მატება, ერთგან იყო მაღალი ცხელების შემთხვევა, თუმცა ჰოსპიტალიზაცია არც ერთ პაციენტს არ დასჭირვებია და ომიკრონით ინფიცირებული პირები იმყოფებიან სახლში, დაკვირვების ქვეშ.
გამყრელიძის თქმით, ეპიდემიოლოგებისა და ლაბორატორიული სამსახურების მიერ მიმდინარეობს ომიკრონით ინფიცირებული პაციენტების დაახლოებით 53 კონტაქტის კვლევა.
ამ დროისთვის ცნობილია, რომ სხვა ვარიანტებთან შედარებით ომიკრონი უფრო გადამდებია, მათ შორის, დელტა ვარიანტთან შედარებით.
ბოლო კვირებში მსოფლიოში ომიკრონით ინფიცირების შემთხვევებმა მკვეთრად მოიმატა. თუმცა, ჯერჯერობით უცნობია, გადააჭარბებს თუ არა მისი გავრცელება დელტა ვარიანტს, რომელიც ჯერ კიდევ დომინანტურია მსოფლიოში.
არსებული მონაცემებით, ომიკრონვარიანტით ინფიცირება იწვევს დაავადების როგორც ასიმპტომატურ, ასევე მსუბუქ და მძიმე განვითარებას და სიკვდილს. ომიკრონს არ აქვს დელტასგან განსხვავებული სიმპტომები.
ჯანმოს წინასწარი მონაცემებით, დელტა ვარიანტთან შედარებით ომიკრონით ინფიცირება ნაკლებად მძიმე დაავადებას იწვევს, თუმცა, რადგან იგი უფრო გადამდებია და მეტი ადამიანის ინფიცირებას იწვევს, ეს გამოიწვევს უკვე გადატვირთული ჯანდაცვის სისტემებზე დამატებით ზეწოლას და ადამიანები ვერ მიიღებენ შესაბამის სამედიცინო მომსახურებას.
