Batumelebi | ვის დასჭირდება სპეციალური საშვი 31 მარტიდან – კომენდანტის საათი ვის დასჭირდება სპეციალური საშვი 31 მარტიდან – კომენდანტის საათი – Batumelebi

ვის დასჭირდება სპეციალური საშვი 31 მარტიდან – კომენდანტის საათი

კომენდანტის საათის გამოცხადებასთან დაკავშირებით, საქართველოში მკაცრდება გადაადგილებასთან დაკავშირებული რეგულაციები. როგორც დღეს, 30 მარტს, ბრიფინგზე მთავრობის წარმომადგენლებმა განაცხადეს, ხვალ 21:00 საათიდან დილის 06:00 საათამდე, იკრძალება ყველა სახის ტრანსპორტის, ასევე ფეხით გადაადგილება ქალაქში.

გადაადგილება დასაშვებია მხოლოდ სპეციალური საშვის მქონე პირებისთვის. კომენდანტის საათებში გადაადგილების დროს სპეციალური საშვი დასჭირდებათ:

  • მედიის წარმომადგენლებს, ჟურნალისტებს, ასევე იმ ავტომანქანებს, რომლითაც მედიის წარმომადგენლები გადაადგილდებიან
  • მობილური კავშირგაბმულობის ოპერატორებს
  • საბანკო სფეროს წარმომადგებლებს
  • სასურსათო და სააფთიაქო ქსელის წარმომადგენლებს

მთავრობის განცხადებით, შეუფერხებლად იმუშავებს ისეთი კომუნალური და მუნიციპალური სერვისები, როგორიცაა წყალმომარაგება, ბუნებრივი გაზით, საწვავით,  ელექტრონეერგიით მომარაგება, საფოსტო მომსახურება და სხვა, მსგავსი სერვისები.

„ასეთი ტიპის ოპერატორებისთვის იქნება დადგენილი სპეციალური რეჟიმი, რომლის ფარგლებშიც მათ ექნებათ ვალდებულება ჯანდაცვის სამინისტროს მიერ დადგენილი ყველა წესის დაცვით იმუშაონ“ – განაცხადა მაია ცქიტიშვილმა, ვიცე-პრემიერმა, რეგიონული განვითარებისა და ინფრასტრუქტურის მინისტრმა.

ზემოთ დასახელებულ პირებს, რომლებსაც სურთ საგანგებო რეჟიმის დროს, კომენდანტის საათის პირობებში  შეუფერხებლად გადაადგილება, სპეციალური საშვის მისაღებად უნდა გააგზავნონ მოთხოვნა შემდეგ ელექტრონულ ფოსტაზე: Pressoffice@gov.ge

კომენდანტის საათი ხვალ, 31 მარტს 21:00 საათიდან ამოქმედდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com