Batumelebi | ბათუმში კორონავირუსით ინფიცირებული ერთი პაციენტი ხელოვნურ სუნთქვაზეა ბათუმში კორონავირუსით ინფიცირებული ერთი პაციენტი ხელოვნურ სუნთქვაზეა – Batumelebi

ბათუმში კორონავირუსით ინფიცირებული ერთი პაციენტი ხელოვნურ სუნთქვაზეა

ბათუმში, კორონავირუსით ინფიცირებული ერთი პაციენტი, რომელიც კლინიკა „მედალფაში“ იმყოფება, ხელოვნურ სუნთქვაზე გადაიყვანეს.

საუბარია 70 წელს გადაცილებულ მამაკაცზე, რომელსაც თანმხლები დაავადებები აღენიშნება, მათ შორის გულ-სისხლძარღვთა ქრონიკული დაავადება.

„ოთხი პაციენტია ჩვენთან, „მედალფაში“. აქედან ერთს ტოტალური პნევმონიის ფონზე განუვითარდა დისტრეს სინდრომი და გადავიყვანეთ ხელოვნური სუნთქვის აპარატზე, ვიტალური მაჩვენებლები ნორმის ფარგლებში აქვს აპარატზე, მეორე პაციენტს აქვს პნევმონია, საშუალო სიმძიმის არის და არ საჭიროებს ხელოვნური სუნთქვის აპარატის მხარდაჭერას. ორის მდგომარეობა კი საერთოდ უსიმპტომოდ მიმდინარეობს“ – უთხრა „ბათუმელებს“ ლევან ანთაძემ, კლინიკა „მედალფას“აჭარისა და გურიის რეგიონალურმა დირექტორმა.

ბოლო მონაცემებით აჭარაში კორონავირუსის დადასტურებული დიაგნოზით 7 პაციენტს მკურნალობენ. სამი მათგანი ბათუმის ინფექციურ საავადმყოფოში იმყოფება, მათი მდგომარეობა დამაკმაყოფილებელია.

ასევე, დღეს ბათუმში ექვი პირის ანალიზის პასუხებს ელოდებიან კორონავირუსზე. ექვსივე პირი კარანტინის ზონიდან გადაიყვანეს ინფექციურ საავადმყოფოში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com