მიუხედავად იმისა, რომ ადამიანები, რომლებიც ნარკოტიკულ საშუალებებს მოიხმარენ, იგივე რისკების წინაშე არიან COVID 19-თან მიმართებაში, როგორც ზოგადი პოპულაცია, ისინი დამატებით რისკებს აწყდებიან, რაც, ძირითადად, დაკავშირებულია ნარკოტიკული საშუალებების მოხმარების წესებთან/ქცევასთან, ასევე გარემოსთან, სადაც ეს ხდება. ნარკოტიკებსა და ნარკოდამოკიდებულობაზე მონიტორინგის ევროპული ცენტრი წერს, რომ ნარკოტიკების მომხმარებელთა შორის ქრონიკული დაავადებების ფართოდ გავრცელების გამო, ბევრი მათგანი რესპირატორული დაავადებების განსაკუთრებული საშიშროების წინაშე შეიძლება აღმოჩნდეს, თუ COVID 19-ით დაინფიცირდებიან. “მაგალითად, მაღალია გულ-სისხლძარღვთა დაავადებები იმ პაციენტებში, რომლებიც მოიხმარენ კოკაინსა და ინექციურ ნარკოტიკებს; მეტამფეტამინი ავიწროებს სისხლძარღვებს, რამაც შესაძლოა ფილტვების დაზიანება გამოიწვიოს, ასევე ოპიოიდების ჭარბი გამოყენება ასუსტებს იმუნიტეტს; მაღალია აივის გავრცელება და ვირუსული ჰეპატიტები ნარკოტიკების მომხმარებლებში”, – წერს ნარკოტიკებსა და ნარკოდამოკიდებულობაზე მონიტორინგის ევროპული ცენტრი.
ნარკოტიკების მომხმარებელთა საერთაშორისო ქსელმა და EuroNPUD, ზიანის შემცირების მიზნით, შეიმუშავეს რჩევები COVID 19-ის პანდემიის დროს, ნარკოტიკის მომხმარებლებისთვის:
- არ გაიზიაროთ ჩიბუხები, ბონგები, ჯოინთები, პლასტმასის ბოთლისგან ხელნაკეთი თუ მოწევისთვის განკუთვნილი სხვა ნებისმიერი ჭურჭელი; ასევე ასაყნოსი მილები და ინსტრუმენტები ინექციისთვის, სტერილიზებული წყლის ჩათვლით.
- მზად იყავით აბსტინენციის სინდრომისთვის, იგივე “ლომკისთვის” – ნარკოტიკულ საშუალებებზე ხელმიუწვდომლობის შემთხვევაში. შეიმუშავეთ მოქმედების გეგმა, მოიმარაგეთ დეტოქსიკაციისთვის საჭირო პრეპარატები, საკვები და სასმელი. ეს ეხება როგორც ოპიატების, ისე სხვა ნარკოტიკების მომხმარებლებს;
- გულმოდგინედ დაიბანეთ ხელები საპნითა და ცხელი წყლით, მინიმუმ 20 წამის განმავლობაში – როცა გექნებათ კონტაქტი სხვა ადამიანთან, თუ შეეხებით ფულს ან ნარკოტიკს. ხელის გამშრალება უმჯობესია ქაღალდის ხელსახოცით;
- თუ გაქვთ ვირუსის სიმპტომები, არ მიხვიდეთ ზიანის შემცირების ადგილობრივ ცენტრში. უმჯობესია შეატყობინეთ თქვენი მდგომარეობის შესახებ ტელეფონით და მიეცით მათ საშუალება მიიღონ შესაბამისი ზომები თქვენი და მათი უსაფრთხოებისთვის.
- თუ გაქვთ სიმპტომები ან ფიქრობთ, რომ ავად გახდით, თავიდან აირიდეთ ზიანის შემცირების ცენტრებში ვიზიტი – სთხოვეთ მოგაწოდონ შპრიცები და სხვა დასარიგებელი მასალა. გააფრთხილეთ, რომ თავს კარგად არ გრძნობთ, რათა მათ შეძლონ შესაბამისი უსაფრთხოების წესების დაცვა;
არ დაგავიწყდეთ სხვისი მოცემული ნებისმიერი შეფუთვის გასუფთავება სპირტის ბაზაზე დამზადებული ანტისეპრტიკით. ასევე მოერიდეთ ნარკოტიკის შეფუთვის (და ნებისმიერი სხვა ნივთის, რაც შეიძლება იყოს ვირუსით დაბინძურებული) მოხვედრას პირში და სხეულის სხვა ნებისმიერ ლორწოვან გარსზე.
გთხოვთ იყავით უსაფრთხოდ და იზრუნეთ ერთმანეთზე.
ვრცლად ეს რჩევები შეგიძლიათ იხილოთ აქ.
