პაციენტი, რომელსაც ბათუმში „კორონავირუსი“ დაუდგინეს, სიცხე არ აქვს და თავს კარგად გრძნობს. ამის შესახებ დღეს, 19 მარტს, ჟურნალისტებს ბათუმის ინფექციური ცენტრის კლინიკურმა მენეჯერმა, ექიმმა ინფექციონისტმა დავით მურვანიძემ უთხრა.
„პაციენტი, რომელსაც დაუდასტურდა ვირუსი, სავსებით მხნედ და ნორმალურად გრძნობს თავს. მას არავითარი ჩივილები არ გააჩნია. ყოველგვარი დამატებითი გამოკვლევის შედეგად არაფერი საგანგაშო ჯერ არ გავქვს. ადეკვატური და ნორმალური მდგომარეობაა, არც სიცხე აქვს და არც გამოხატული რაიმე პრობლემა არის სასუნთქი გზებიდან გამომდინარე. ასე რომ, ყველაფერი კარგად მიდის,“ – აღნიშნა ინფექციონისტმა დავით მურვანიძემ.
ბათუმის ინფექციური ცენტრის მენეჯერმა ისაუბრა იმ ოთხ პაციენტზეც, რომლებიც გუშინ ღამით მიიყვანეს კლინიკაში საკარანტინო სივრციდან. დავით მურვანიძის თქმით, ყველა ანალიზი აღებულია და დღის მეორე ნახევრისთვის ელოდებიან პასუხს.
თბილისის ინფექციური საავადმყოფოს სამედიცინო დირექტორის, მარინა ეზუგბაიას თქმით, ინფექციურ საავადმყოფოში მოთავსებული 31 პაციენტიდან 3-ის მდგომარეობა პრობლემურია მათი სხვა დაავადებებიდან გამომდინარე.
რაც შეეხება კორონავირუსის შემთხვევებს 19 მარტის მდგომარეობით: საქართველოში ამ დროისათვის ლაბორატორიულად დადასტურებულია 40 შემთხვევაა, აქედან 1 გამოჯანმრთელებულია. კარანტინის რეჟიმში იმყოფება 1 344 ადამიანი, ხოლო სტაციონარში მეთვალყურეობის ქვეშ – 216.
