მთავარი,სიახლეები

მილანში ჩასული ჩინელი ექიმების სოლიდარობის გზავნილი იტალიას

18.03.2020 • 1510
მილანში ჩასული ჩინელი ექიმების სოლიდარობის გზავნილი იტალიას

“ჩვენ ტალღები ვართ იგივე ზღვიდან, ფოთლები იმავე ხიდან და ყვავილები იმავე ბაღიდან,” – ამ შინაარსის წარწერით გაშალეს ბანერი დღეს, 18 მარტს, მილანში, მალპენზას აეროპორტში ჩასულმა ჩინელმა ექიმებმა და სამედიცინო სფეროს სხვა წარმომადგენლებმა.

მოგვიანებით მათ განმარტეს, რომ ეს იყო სოლიდარობის და იმედის გზავნილი ჩინეთიდან მთელი იტალიისათვის.

ეს ჩინელი ექიმების მეორე გუნდია, რომელიც იტალიელი ექიმების დასახმარებლად ჩავიდა. მათ თან 400 ათასი სამედიცინო ნიღაბი და სხვადასხვა სამედიცინო დანიშნულების ნივთი ჩაიტანეს, მათ შორის: მედიკამენტები,  რესპირატორები და სპეციალური აღჭურვილობა კორონავირუსით ინფიცირებულ პაციენტებთან სამუშაოდ.

იტალიური გამოცემების ცნობით, მომდევნო დღეებში იტალიაში ჩინეთიდან 300 ექთანი და ექიმი ჩავა მათ დასახმარებლად.

იტალიაში კორონავირუსით გარდაცვლილთა რიცხვმა ჯამში თითქმის 3 ათასს მიაღწია. 18 მარტს Covid-19-ით იტალიაში 475 ადამიანი გარდაიცვალა. ქვეყანაში სულ დადასტურებულია კორონავირუსის 35 713 შემთხვევა, ინფიცირებულთაგან 4 000 განიკურნა.

ყველაზე მეტად ვირუსმა ლომბარდიის რეგიონი დააზარალა, სადაც ერთი დღის განმავლობაში სიკვდილის 319 შემთხვევა დაფიქსირდა.

 

გადაბეჭდვის წესი


ასევე: