გარემოს დაცვისა და სოფლის მეურნეობის მინისტრმა ლევან დავითაშვილმა განაცხადა, რომ ქვეყანას სურსათის მარაგის დეფიციტი არ აქვს:
„შეკვეთები გზაშია, ამინდის გამო რთულდება ფოთში ჩამოსული გემებიდან პროდუქტების ჩამოტვირთვა, მეორე მხრივ, დასავლეთიდან აღმოსავლეთ საქართველოში დამაკავშირებელ მარშრუტზე, ამინდის გამო, არის სირთულეები. ლარსზე არის ძალიან დიდი რიგი, სურსათით დატვირთული 1000-ზე მეტი მანქანა დგას დღეს ლარსზე, რადგან ზვავსაშიშროების გამო გაწმენდითი სამუშაოები ზოგიერთ მონაკვეთზე არის შეზღუდული,” – განაცხადა მინისტრმა.
მან ასევე აღნიშნა, რომ ქვეყანაში სურსათის მარაგი კონტროლდება და მოსახლეობას კიდევ ერთხელ მოუწოდა სიმშვიდისკენ:
„სურსათით უზრუნველყოფასთან დაკავშირებით, უწყვეტ რეჟიმში მიმდინარეობს სხვადასხვა მომწოდებელ რგოლთან კომუნიკაცია. ჩვენ ძირითადად სასურსათო პროდუქტებს ვამონიტორინგებთ, ასევე ძირითადი პირველადი მოხმარების პროდუქტებს (ეს არის 22 იდენტიფიცირებული პროდუქტი). მიწოდების მიუხედავად, ჩვენ ვხედავთ პანიკურ მოთხოვნას და ფაქტიურად უკონტროლო შესყიდვებს. ბევრ სუპერმარკეტსა თუ საცალო ობიექტში დღის განმავლობაში ზოგიერთ ასაწონ ბურღულეულზე იყო გარკვეული შეფერხება, ეს ერთადერთი მიზეზითაა გამოწვეული, შეკვეთები გზაშია“.
მინისტრმა ბიზნესოპერატორებს კიდევ ერთხელ მოუწოდა, რომ არ გამოიყენონ სიტუაცია სპეკულაციისთვის.
მინისტრმა ასევე განაცხადა, რომ მნიშვნელოვანია კრიზისული პერიოდის დროს ქვეყანაში შენარჩუნდეს სტაბილური ფასები, რის გამოც ბიზნესსექტორთან შეთანხმების შემდეგ, იმუშავებენ სპეციალური მექანიზმით, რაც უზრუნველყოფს ფასების სტაბილურობას იმ 7 ძირითად პროდუქტზე, რომელზეც ახლა ძალიან გაზრდილია მოთხოვნა.
ეს პროდუქტებია: ბრინჯი, მაკარონი, მზესუმზირის ზეთი, ფქვილი, შაქარი, ხორბალი, რძის ფხვნილი ან/და მისგან წარმოებულ პროდუქტები.
„გვექნება განსაკუთრებული მექანიზმი, რომ ძირითადად სასურსათო პროდუქტზე დავაზღვიოთ იმპორტიორებისთვის სხვადასხვა ეკონომიკური, ფინანსური, მათ შორის სავალუტო რისკები, იმისთვის, რომ ფასები შევინარჩუნოთ პირველადი მოხმარების ყველაზე კრიტიკულად მოთხოვნად, სასურსათო პროდუქტებზე. ეს მექანიზმი გულისხმობს საკურსო ფლუქტუაციის [მერყეობის] დაზღვევას, მაგრამ იმ პირობით, რომ ფასების სტაბილურობას შეინარჩუნებენ ეს ბიზნესები,” – განაცხადა ლევან დავითაშვილმა.
