Batumelebi | რას სთავაზობს მთავრობა თურქეთში დასაქმებულებს – მინისტრის განმარტება რას სთავაზობს მთავრობა თურქეთში დასაქმებულებს – მინისტრის განმარტება – Batumelebi
RU | GE  

რას სთავაზობს მთავრობა თურქეთში დასაქმებულებს – მინისტრის განმარტება

საქართველოს სოფლის მეურნეობის მინისტრის, ლევან დავითაშვილის განცხადებით, თურქეთში სეზონური დასაქმება შესაძლოა მნიშვნელოვნად ჩანაცვლდეს საქართველოში, სოფლის მეურნეობაში შექმნილი სამუშაო ადგილებით. ამის შესახებ დავითაშვილმა დღეს, 21 ივლისს, განაცხადა საქართველოს მთავრობის ადმინისტრაციაში, კორონავირუსთან დაკავშირებით მოქმედი უწყებათაშორისი საკოორდინაციო საბჭოს სხდომის შემდეგ.

„ჩვენ გვესმის, რომ ძალიან დიდი სურვილი იყო აჭარაში მცხოვრები მოსახლეობის დასაქმების ჩვენ მეზობელ თურქეთის რესპუბლიკაში. ჩვენ ორგანიზებულად, აჭარის ადგილობრივ მთავრობასთან და კახეთში მუნიციპალიტეტებთან ერთად, მოვახერხეთ სამუშაო ძალის კახეთში მობილიზება. თუმცა, ეს არის მხოლოდ ერთი ნაწილი, ჩვენ გვესმის, რომ შიდა დასაქმების ახალი პერსპექტივები ჩნდება სხვადასხვა კუთხეში. ჩვენ გვექნება ძალიან ინტენსიური მოსავლის აღებისა და დაბინავების სეზონი კახეთში, რომელიც უკავშირდება ყურძნის მოსავალს, რთველს, ამის შემდეგ გვექნება ინტენსიურად შიდა ქართლში სამუშაო ძალის საჭიროება და სეზონური დასაქმება, რომელიც საკმაოდ პოპულარული იყო ჩვენს მოსახლეობაში, ჩვენს მეზობელ ქვეყნებში, ჩვენ შეიძლება მნიშვნელოვანწილად ჩავანაცვლოთ საქართველოში შეთავაზებული სამუშაო ადგილებით“, – განაცხადა სოფლის მეურნეობის მინისტრმა.

ლევან დავითაშვილმა განაცხადა, რომ სამუშაო ძალა გადანაწილდება საქართველოს სხვადასხვა კუთხეში იმგვარად, რომ სოფლის მეურნეობაში ადამიანების დასაქმების ახალი შესაძლებლობები გაჩნდეს:

„ჩვენ შეგვიძლია ვთქვათ, რომ სოფლის მეურნეობაში მოთხოვნა სამუშაოზე არის მნიშვნელოვანწილად გაზრდილი. დარგი ახდენს გენერირებას ახალი სამუშაო ადგილების, ახლა განსაკუთრებით აქტუალურია კახეთის რეგიონი, სადაც არის სეზონური დასაქმების საშუალებები, ძალიან ინტენსიურად მიდის ხილის სხვადასხვა კულტურის დაბინავება, პირველ რიგში, ატმის კულტურას ეხებოდა ეს, სადაც საქართველოს სხვადასხვა კუთხიდან დაახლოებით ორი ათასამდე ადამიანი არის დასაქმებული“.

სეზონური დასაქმებისთვის ყოველწლიურად ათიათასობით ადამიანი გადადიოდა სამუშაოდ თურქეთის რესპუბლიკაში. საზღვარი თურქეთთან 15 მარტს ჩაიკეტა და დღემდე არ გახსნილა.

ბოლო ერთი თვის განმავლობაში ბათუმში არაერთი აქცია გამართეს თურქეთში რეგულარულ სამუშაოზე დასაქმებულმა ქალებმა. ისინი თურქეთთან საზღვრის გახსნას ან საზღვრის გახსნამდე ყოველთვიურ კომპენსაციას ითხოვენ.

____

ამავე თემაზე:

ჩვენ არ გავჩერდებით – თურქეთში დასაქმებული ქალების საპროტესტო გზავნილი

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com