საქართველოს მთავრობამ ბრიფინგების დისტანციურად ჩატარების გადაწყვეტილება მიიღო. ამის შესახებ მთავრობის უწყებათაშორისი კომისიის სხდომის დასრულების შემდეგ დღეს, 18 მარტს, გახდა ცნობილი. გადაწყვეტილების მიზეზი კორონავირუსის პრევენციაა.
„იმისათვის, რომ უზრუნველვყოთ თქვენი დაცულობა დღეს, მთავრობა გადადის განსხვავებულ რეჟიმზე ბრიფინგების ტრანლირებისას,“ – განმარტა სხდომის შემდეგ მთავრობის სპიკერმა ირაკლი ჩიქოვანმა. მისივე ინფორმაციით, თითოეული ტელევიზია საერთო სიგნალს საზოგადოებრივი მაუწყებლის დახმარებით მიიღებს, ხოლო ჟურნალისტებს კითხვების დასმის საშუალება მხოლოდ პრესსამსახურის გავლით მოუწევთ:
„ასევე, თქვენ გექნებათ საშუალება, წინასწარ მიაწოდოთ ჩვენს პრესსამსახურს კითხვები, ოპერატიულ რეჟიმში შეიქმნება საკომუნიკაციო პლატფორმა და ჩვენ მზად ვართ, ყველა თქვენს შეკითხვას ვუპასუხოთ ოპერატიულად,“ – განაცხადა ირაკლი ჩიქოვანმა.
