ბათუმის ინფექციური საავადმყოფოს ბოქსირებულ განყოფილებაში ორი პაციენტი შეიყვანეს კარანტინის ზონიდან.
ბათუმის ინფექციური ცენტრის კლინიკური მენეჯერის, ექიმ-ინფექციონისტ დავით მურვანიძის განცხადებით, ორივე მათგანს აქვს მოგზაურობის ისტორია, რის გამოც იმყოფებოდნენ კარანტინში:
„მათ ჰქონდათ მცირედგამოხატული ცხელება და ოდნავ გამოხატული კატარალური მოვლენები, ყელის ტკივილი, წამოხველება და ა.შ. ორივე ახალი შემთხვევაა, ანალიზები აღებულია, ველოდებით პასუხს“.
რაც შეეხება პაციენტს, რომელსაც ბათუმის ინფექციურ საავადმყოფოში დადასტურებული კორონავირუსის დიაგნოზით იმყოფება, მისი მდგომარეობა, დავით მურვანიძის თქმით, დამაკმაყოფილებელია, პაციენტს ამ დროისთვის ჩივილები და ცხელება არ აღენიშნება.
ბოლო მონაცემებით საქართველოში COVID-19-ის 38 დადასტურებული შემთხვევაა. კარანტინის რეჟიმში იმყოფება 1130 ადამიანი, სტაციონარში მეთვალყურეობის ქვეშ კი – 81.
