გუშინ, 14 მარტს, ბათუმის ინფექციურში გადაყვანილი 3 პირიდან ერთ ქალს კორონავირუსი დაუდასტურდა. ამის შესახებ ახლახან [19:48, 15 მარტი] გახდა ცნობილი. პაციენტს აქვს ვირუსის მსუბუქი ფორმა და ის ბათუმის ინფექციურში აგრძელებს მკურნალობას.
აჭარის ჯანდაცვის მინისტრის, ზაალ მიქელაძის თქმით, ეს პირი ქვეყანაში ყველა წესის დაცვით შემოვიდა.
როგორც აჭარის ჯანდაცვის სამინისტროში აცხადებენ, გუშინ ინფექციურ საავადმყოფოში გადაყვანილი სამივე პირი საქართველოში იტალიიდან შემოვიდა. ისინი საქართველოს მოქალაქეები არიან.
იტალიიდან შემოსვლის შემდეგ სამივე პირი კარანტინში იმყოფებოდა, თუმცა გუშინ, 14 მარტს, ადრე დილით, ისინი ინფექციურში გადაიყვანეს.
ბათუმის ინფექციურ საავადმყოფოში დღეს, 15 მარტს, კიდევ ოთხი პირი შეიყვანეს. აჭარის ჯანდაცვის სამინისტროს ინფორმაციით, ყველა მათგანის პასუხი COVID-19-ის ტესტზე უარყოფითი იყო.
დღეს, 15 მარტის მონაცემებით, საქართველოში სულ კორონავირუსის 33 დადასტურებული შემთხვევაა. მათ შორის სამი დღეს დადასტურდა. კარანტინის რეჟიმში 427 პაციენტი იმყოფება, 73 კი სტაციონარში მეთვალყურეობის ქვეშ რჩება.
