მთავარი,სიახლეები

რა უნდა გააკეთოს საზოგადოებამ აჭარის მაუწყებლის გადასარჩენად – დისკუსია

02.03.2020 • 3243
რა უნდა გააკეთოს საზოგადოებამ აჭარის მაუწყებლის გადასარჩენად – დისკუსია

როგორ შეიძლება ჩაერთოს საზოგადოება აჭარის ტელევიზიის გადარჩენის პროცესში – ამ თემაზე დღეს, 2 მარტს, სასტუმრო “ლე პორტში” დისკუსია შედგა. შეხვედრა “თავისუფალ ჟურნალისტთა სახლის” მიერ იყო ორგანიზებული.

ტელევიზიის ალტერნატიულმა პროფკავშირმა მენეჯმენტს უკვე მიმართა საგაფიცვო მოთხოვნებით. ერთ-ერთი მოთხოვნა ტელევიზიაში სტატუსკვოს აღდგენაა – საინფორმაციო სამსახურების რედაქტორების ძველ პოზიციებზე დაბრუნება.

“ეს არ არის მხოლოდ ამ ტელევიზიის თანამშრომლების პრობლემა,” – თქვა დისკუსიაზე ჟურნალისტმა ირმა ზოიძემ. ის საგამოძიებო სიუჟეტებს ამზადებდა აჭარის ტელევიზიისთვის გარე სტუდიიდან. ტელევიზიის ახალმა დირექტორმა, გიორგი კოხრეიძემ, საგამოძიებო ფილმების შესყიდვაზეც უარი განაცხადა.

ჟურნალისტმა მედიაციის პროცესში სხვა მხარეების ჩართულობის საჭიროებაზე ისაუბრა.

“შესაძლოა, არსებობდეს სამართლებრივი პრობლემა, რადგან მოლაპარაკების პროცესში გაჟღერდება პერსონალური ინფორმაციაც. ჩვენ გავივლით ამ საკითხს,” – აღნიშნა ალტერნატიული პროფკავშირის ხელმძღვანელმა, მალხაზ რეხვიაშვილმა.

“კრიზისია მაუწყებელში… ხვალ ვის დაუმიზნებს მაუწყებლის დირექტორი და ვინ იქნება მსხვერპლი, არავინ იცის,” – აღნიშნა მაია მერკვილაძემ. მან ასევე თქვა, რომ ერთ-ერთი ინფორმაციით, ტელევიზიის საინფორმაციო სამსახურის უფროსის პოსტს ლალი ბერძენიშვილს სთავაზობენ. მაია მერკვილაძე მაუწყებელში საინფორმაციო სამსახურის უფროსის მოადგილე იყო და მისი შტატი ახალმა დირექტორმა გააუქმა.

“საღამოს უკვე ახალი რედაქტორი გვეყოლება… მადლობა თქვენ მხარდაჭერისთვის,” – მიმართა აუდიტორიას “მთავარის” წამყვანმა, თეონა ბაკურიძემ და შეხვედრა დღევანდელი გადაცემის მომზადების მიზეზით დატოვა. მან წინა გადაცემა ჟურნალისტებთან ერთად პროტესტის ფონზე – წუთიერი დუმილით დაასრულა. ჟურნალისტებს სტუდიაში ტრანსფარანტები ეჭირათ ხელში წარწერით: “ტელევიზიაში სუს-ია”.

“ლელოს” ბათუმის წარმომადგენელი, ირაკლი კუპრაძე დაინტერესდა, როგორ შეიძლება ჩაერთონ საზოგადოების წარმომადგენლები და პოლიტიკოსები ტელევიზიის დაცვის პროცესში.

“ალტერნატიული პროფკავშირი მუშაობს სტრატეგიაზე, როგორ მოხდეს რიგითი მაყურებლის ჩართულობა… ზუსტი პასუხი ახლა არ მაქვს, მაგრამ მიმდინარეობს აქტიური მსჯელობა,” – უპასუხა კითხვას აჭარის ტელევიზიის ჟურნალისტმა, გიორგი არობელიძემ.

“ჩვენ მზაობას გამოვხატავთ, რომ ჩავებათ ამ ბრძოლაში,” – დასძინა ირაკლი კუპრაძემ.

“მეც თქვენთან ვარ ამ ბრძოლაში. ბოლო დროს დავიწყე აჭარის ტელევიზიის ყურება… უფრო მეტი აქტიურობაა საჭირო, რომ ხალხმა გაიგოს, რა ხდება,” – თქვა ადვოკატმა ლელი ბჟალავამ. ის დარბაზის მოსაზრებით დაინტერესდა, რატომ არიან მსგავს ვითარებაში, მაგალითად, სტუდენტები ჩუმად?

ადვოკატის ეს შეკითხვა უპასუხოდ დარჩა.

“მისასალმებელია, რომ 70-მა კაცმა კომფრომიზმი გვერდზე გადადო და იბრძვიან, მათ უკან ოჯახებია… მიხარია, რომ ამდენი მებრძოლი ადამიანი გამოჩნდა ტელევიზიაში,” – აღნიშნა გიორგი მასალკინმა, პოლიტიკური მოძრაობიდან “ლელო”.

დისკუსიას ესწრებოდა უმაღლესი საბჭოს წევრი “ნაციონალური მოძრაობიდან” გია აბულაძეც. მისი თქმით, საერთაშორისო ორგანიზაციები და საელჩოები ბოლომდე ინფორმირებულნი არ არიან.

“თავისუფალ ჟურნალისტთა სახლის” ხელმძღვანელი, ასლან ჭანიძე ფიქრობს, რომ “ალტერნატიულმა პროფკავშირმა” და სამოქალაქო სექტორმა ერთად უნდა იმუშაოს საკანონმდებლო ცვლილებების კუთხითაც, რომლითაც პოლიტიკოსებისგან სარედაქციო ჩარევების გამორიცხვის მყარ გარანტიებს შექმნის.

მრჩეველთა საბჭოს დაკომპლექტების წესზე ისაუბრა მალხაზ ჭკადუამაც, “გამჭვირვალობა საქართველოს” რეგიონული ოფისების მენეჯერმა, იგი დღევანდელი დისკუსიის მოდერატორი იყო.

მალხაზ ჭკადუა ფიქრობს, რომ საკანონმდებლო ცვლილებების კუთხით პროცესში კოალიცია “მედია ადვოკატირებისთვის” უნდა ჩაერთოს.

ტელევიზიის ალტერნატიული პროფკავშირის ხელმძღვანელმა, მალხაზ რეხვიაშვილმა, ყურადღება გაამახვილა ევროპულ კანონმდებლობაზე, რომლის მიხედვითაც ჟურნალისტისთვის სიტყვის თავისუფლება დაკავშირებულია შრომით უფლებასთან.

“თუ მე არ მექნება სარედაქციო დამოუკიდებლობა და იგი არ იქნება უზრუნველყოფილი, მიზღუდავ შრომის უფლებას,” – აღნიშნა მალხაზ რეხვიაშვილმა.

“ყურადღების გადატანა არ უნდა მოხდეს, მეტი კონკრეტიკაა საჭირო,” – მიმართა დარბაზს თეონა დიასამიძემ, “დემოკრატიული ჩართულობის ცენტრის” კოორდინატორმა ბათუმში. მისი აზრით, საკანონმდებლო ცვლილებაზე საუბრის დრო ახლა არ არის, რადგან ტელევიზიაში კრიზისია.

“…მე ჯერ კიდევ მიწევს ახლობლებსა და მეგობრებთან იმის მტკიცება და ახსნა, თუ რაა გადასარჩენი ტელევიზიაში. მხარდამჭერების ეს წრე უნდა გაფართოვდეს,” – თქვა  მზია ქედელიძემ, მოძრაობის „ალტერნატივა“ წევრმა.

“ხელისუფლებას არ აქვს წერტილოვანი დარტყმები… მას აქვს გაწელილი ეს პროცესი. ისინი მოქმედებენ სხვა სტრატეგიით, რომ ადამიანები გახადონ ინდიფერენტული ბევრი რამის მიმართ,”- ასე  ახსნა მდგომარეობა მალხაზ ჭკადუამ, დღევანდელი დისკუსიის მოდერატორმა.

გადაბეჭდვის წესი


ასევე: