მეგობარი ქალისთვის სექსის იძულების, ოჯახში ძალადობისა და ადევნებისთვის მოსამართლემ კაცი 7 ათასი ლარით დააჯარიმა. მოსამართლე გიორგი ებანოიძემ სამივე მუხლზე ჯარიმის გამოყენება არჩია.
განაჩენის მიხედვით, კონფლიქტი წყვილს შორის მაშინ დაიწყო, როცა ქალმა კაცთან ურთიერთობა შეწყვიტა. კაცი მას თვეების განმავლობაში აიძულებდა შეხვედრას და სექსუალურ კონტაქტს. ერთ-ერთ ეპიზოდში, კაცი ქუჩაში შეხვდა ქალს და დაარტყა ხელი სახეში. კაცმა ფიზიკურად შეურაცხყო იქვე მყოფი მისი არასრულწლოვანი შვილიც.
პროკურატურა ბრალდებულს ასევე ედავებოდა ადევნებას და სექსუალური კავშირის იძულებას „სახელის გამტეხი ინფორმაციის გახმაურების მუქარით“.
„…წინააღმდეგ შემთხვევაში დაემუქრა, რომ მის ყოფილ ქმარს გააგებინებდა მისი მეგობარი მამაკაცის შესახებ – სახელს გაუტეხდა და შეარცხვენდა, რაც არსებითად დააზიანებდა მ.-ს უფლებას… პირადი ურთიერთობის ჩამოყალიბების მიზნით, იგი სისტემატურად უთვალთვალებდა მ-ს და არასასურველ კომუნიკაციას ამყარებდა მასთან… მუდმივად აკითხავდა ავტომანქანით, უსიგნალებდა და ხმამაღლა ეძახდა, რის შემდგომაც მ. ამყარებდა მისთვის არასასურველ კომუნიკაციას, აყენებდა სიტყვიერ
შეურაცხყოფას, სისტემატურად ახორციელებდა სატელეფონო ზარებსა და შეტყობინებებს… წინააღმდეგობრივი დამოკიდებულების გამოხატვისას, აშანტაჟებდა პირადი ხასიათის ინფორმაციის გამჟღავნებით, ასევე, შეურაცხყოფას აყენებდა ამ უკანასკნელის არასრულწლოვან შვილს,“ – აღნიშნულია განაჩენში.
განაჩენის მიხედვით, დაზარალებულად ცნობილმა ქალმა საფრთხის თავიდან აცილების მიზნით რამდენჯერმე შეიცვალა საცხოვრებელი ადგილი და საკონტაქტო ტელეფონის ნომერი.
ბრალდებული ამ საქმეზე პროკურატურის მიერ წარმოდგენილ ყველა მტკიცებულებას დაეთანხმა და იგი სადავოდ არ გაუხდია.
ყველაზე მძიმე, რასაც პროკურატურა ბრალდებულს ედავებოდა, სისხლის სამართლის კოდექსის 139-ე მუხლია – სექსუალური კავშირის იძულება სასჯელის სახით 3 წლამდე თავისუფლების აღკვეთასაც ითვალისწინებს. თბილისის საქალაქო სასამართლოს მოსამართლე გიორგი ებანოიძემ არც სხვა მუხლებზე ჩათვალა საჭიროდ სასჯელის მძიმე ფორმის გამოყენება.
მოსამართლემ ბრალდებულს შეფარდებული ჯარიმა – 10 ათასი ლარი 7 ათას ლარამდე შეუმცირა იმიტომ, რომ იგი დაახლოებით ორი თვე წინასწარ პატიმრობაში იმყოფებოდა.
