ანიმაციური ფილმების გმირების ფიგურებში, რომლებიც დაზიანებულია და ახალ ბულვარში ალაგია, ბულვარის ადმინისტრაციას თანხა გადახდილი არ აქვს. ამის შესახებ „ბათუმელებს“ ადმინისტრაციაში უთხრეს. ფიგურებში დახარჯული თანხის გამო, ტენდერში გამარჯვებულ კომპანია „ალიგატორი 1“ ბულვარს სასამართლოში ედავება.
ანიმაციური ფილმების გმირების დაზიანებული ფიგურები ახალ ბულვარში / 8.01.2020
2016 წლის აპრილში, ბულვარსა და კომპანია „ალიგატორი 1“-ს შორის, ანტივანდალური ფიგურების შეძენა-მონტაჟზე ხელშეკრულება 69 140 ლარზე გაფორმდა. კომპანიამ ფიგურები ბულვარში დაამონტაჟა [ეს ტენდერის მოთხოვნა იყო], თუმცა ადმინისტრაციაში აცხადებენ, რომ მიღება-ჩაბარების აქტი არ გაფორმებულა და ხელშეკრულება 2016 წლის აგვისტოში შეწყვიტეს.
„მიღება-ჩაბარების აქტის გაფორმებამდე აღმოჩნდა, რომ ფიგურები არ შეესაბამებოდა იმ მოთხოვნებს, რაც გვქონდა ტენდერში მითითებული და არ იყო უსაფრთხო ბავშვებისთვის. ეს დაადასტურა ინსპექტირების ჯგუფმაც, ამიტომ ხელშეკრულება კომპანიასთან შეწყდა. მიუხედავად ამისა, კომპანიამ არ მოახდინა ფიგურების დემონტაჟი და სასამართლოს მიმართა. პირველი და მეორე ინსტანცია მოვიგეთ, თუმცა, ახლა საქმე უზენაეს სასამართლოშია, რომლის გადაწყვეტილებაც ჯერ არ გვაქვს“, – გვითხრა „ბათუმის ბულვარის“ იურისტმა თამარ თავართქილაძემ.
მისივე თქმით, უსაფრთხოების მიზნით, ანიმაციური ფილმების გმირების ფიგურები თავად ბულვარის ადმინისტრაციამ აიღო და ახალ ბულვარში, ამფითეატრთან დაალაგა: „ტერიტორიიდან არ გავიტანეთ, ვინაიდან სასამართლო დავა მიმდინარეობს“.
სხვადასხვა ანიმაციური ფილმების გმირების ანტივანდალური ფიგურების შეძენაზე ბულვარს ტენდერი 98 ათასი ლარზე ჰქონდა გამოცხადებული. შესყიდვის ობიექტები იყო: თითო ცალი – ლომი „ალექსი“, სუპერმენი, კომფუ პანდა, კაპიტანი ამერიკა, რკინის მამაკაცი, თორი, სპაიდერმენი; ასევე ოთხი ცალი დინოზავრი.
ამ თემაზე:
