ბათუმის ახალ ბულვარში, ე.წ. ამფითეატრის მიმდებარედ, ერთ დროს ბულვარში განთავსებული ფიგურები, დეკორატიული სკულპტურები, ფილები თუ სხვადასხვა სახის ინვენტარი, ღია ცის ქვეშ, უწესრიგოდ ყრია. ფიგურების და ინვენტარის უმეტესობა დაზიანებულია.
ამ ადგილზე დაზიანებული ნივთები ბოლო რამდენიმე წელია ალაგია, თუმცა, ამ კონკრეტულ შემთხვევაში, ბულვარის ადმინისტრაციაში გვითხრეს, რომ წლის ბოლოს მიმდინარეობდა ინვენტარიზაცია და დაახლოებით 10 დღის შიგნით ტერიტორია დალაგდება.
„უმეტესი მათგანი, რაც მაქ არის დასაწყობებული, არის დროებით და უნდა დავალაგოთ. ნაწილი ექვემდებარება აღდგენას და შეკეთების შემდეგ ძველ ადგილზე დავაბრუნებთ. მაგალითად, სკულპტურა „მე, შენ და ბათუმი“ ანბანის კოშკთან მოედნის რეაბილიტაციის გამო მოვხსენით, ის არ არის ჩამოწერილი და დავაბრუნებთ თავის ადგილზე. დანარჩენი, რახან ინვენტარიზაციის პროცესი მიმდინარეობს, ვერ მოვასწარით ყველას აღრიცხვა. ნაწილი ჩამოწერილია და მაქვე სასაწყობო მეურნეობაში გადავიტანთ.“ – გვითხრეს ბულვარის ადმინისტრაციაში.