ბათუმის აეროპორტის გამტარუნარიანობის გაზრდის მიზნით კომპანია „ტავ ჯორჯია“ აეროპორტის გაფართოებას გეგმავს. მედიაში გავრცელებული ინფორმაციით, კომპანიის მიერ პროექტის განხორციელებას აფერხებს საქართველოს ეკონომიკისა და მდგრადი განვითარების სამინისტრო, რასაც სამინისტრო ოფიციალურად უარყოფს.
ეკონომიკისა და მდგრადი განვითარების სამინისტროს ინფორმაციით, „კომპანია „ტავ ჯორჯიამ“ საქართველოს აეროპორტების გაერთიანებას ბათუმის ალექსანდრე ქართველის სახელობის აეროპორტის გაფართოების სრული პროექტი მხოლოდ 2019 წლის 18 ნოემბერს წარუდგინა. შესაბამისად, მოგვეცა საშუალება და ამ ეტაპზე მიმდინარეობს პროექტის განხილვა, რაზეც პასუხი კომპანიას უახლოეს ხანებში ეცნობება“.
„ამიტომ ჩვენთვის მიუღებელია კომპანიის მხრიდან გამოთქმული პრეტენზია, რომ პროექტთან დაკავშირებით ჯერ პასუხი არ მიუღია ეკონომიკისა და მდგრადი განვითარების სამინისტროს შპს „საქართველოს აეროპორტების გაერთიანებისგან“… პრინციპული თანხმობა გაფართოების პროექტთან დაკავშირებით გაცემულია და კომპანიას მიღებული აქვს ოფიციალური თანხმობა 2018 წლის ნოემბრის დასაწყისში პროექტის განხორციელებასთან დაკავშირებით საქართველოს აეროპორტების გაერთიანებისგან. თუმცა, ამ დრომდე „ტავ ჯორჯიას“ არ ჰქონდა პროექტი სრული სახით წარმოდგენილი, რამაც ხელი შეუშალა საბოლოო გადაწყვეტილების მიღებას“, – აცხადებს სამინისტრო.
„ტურისტების ღირსეულად დახვედრის მიზნით ჩვენთვის პრიორიტეტულია ბათუმის აეროპორტის შეუფერხებლად ფუნქციონირება და გაფართოება. შესაბამისად, ჩვენ აქამდეც ვუჭერდით მხარს და მომავალშიც მხარდაჭერას აღმოვუჩენთ ბათუმის აეროპორტის გაფართოების პროექტს“, – აცხადებენ სამინისტროში.
აეროპორტების გაერთიანების ინფორმაციით, ბათუმის აეროპორტი „ტავ ჯორჯიას“ მართვაშია 2027 წლამდე.
„ბათუმელების“ ინფორმაციით, კომპანია ძირითადად აეროპორტის [ტერმინალის] გაფართოებას გეგმავს და პროექტი სწორედ 2027 წლამდე პერიოდზეა გათვლილი.
„ბათუმელები“ „ტავ ჯორჯიას“ ვერ დაუკავშირდა.
პარალელურად, „საქართველოს აეროპორტების გაერთიანება“ ბათუმის საერთაშორისო აეროპორტის 10-წლიან განვითარებასთან დაკავშირებით ტექნიკურ-ეკონომიკურ კვლევას ატარებს. „კვლევის მიხედვით, მოხდება ბათუმის საერთაშორისო აეროპორტის ინფრასტრუქტურის დეტალურად შესწავლა, რათა განხორციელდეს მოკლევადიანი და გრძელვადიანი განვითარების გეგმების შემუშავება“, – აღნიშნული იყო აეროპორტების გაერთიანების მიერ გავრცელებულ განცხადებაში.
„საქართველოს აეროპორტების გაერთიანებას“ საკონსულტაციო მომსახურებას საერთაშორისო საკონსულტაციო კომპანია „TH Airport Consulting“-ი უწევს.
სწორედ ამ კვლევაზე იქნება დამოკიდებული სამომავლოდ, ბათუმის აეროპორტის ბედი – ის დარჩება ადგილზე თუ გადაიტანენ.
„ბათუმელების“ ინფორმაციით, ვინაიდან ბათუმის აეროპორტს გაფართოების შანსი არ აქვს, ამასთან, ერთგვარად ხელს უშლის ქალაქის განვითარებას [სიმაღლეში გაზრდას – სიმაღლის შემზღუდავი სივრცეების გამო], საქართველოს მთავრობა განიხილავდა აეროპორტის ბათუმიდან გადატანის საკითხი.
ბათუმის მომავალი აეროპორტის სავარაუდო ადგილად კი, ოზურგეთის მუნიციპალიტეტის სოფელი მერია [აქ ადრე აეროდრომი იყო] ან ქობულეთის აეროდრომის ტერიტორია განიხილებოდა.
ამ თემაზე:
უსაფრთხოა თუ არა ფრენებისთვის ბათუმის აეროპორტი ახალი მაღლივი მშენებლობების პირობებში
