მთავარი,სიახლეები

ახალი სასწავლო პროგრამა აქტიური მოქალაქეებისთვის

20.11.2019 • 1532
ახალი სასწავლო პროგრამა აქტიური მოქალაქეებისთვის

პოლიტიკური კულტურის და ამომრჩევლის გაძლიერებისთვის აქტიურ მოქალაქეებს ბათუმში უფასო ტრეინინგკურსის გავლა შეუძლიათ. პროგრამას „აღმოსავლეთ ევროპის ცენტრი მრავალპარტიული დემოკრატიისთვის“ ახორციელებს აშშ-ის საერთაშორისო განვითარების სააგენტოს USAID-ის დაფინანსებით და ეკონომიკური პოლიტიკის კვლევის ცენტრთან EPRC თანამშრომლობით.

„მთავარი მიზანია იმ მოქალაქეების გაძლიერება, რომელსაც აინტერესებს საჯარო პოლიტიკაში მონაწილეობა და სამოქალაქო აქტივობა. მონაწილეობა შეუძლია ნებისმიერ დაინტერესებულ მოქალაქეს 18 წლიდან, განაცხადების მიღება უკვე დავიწყეთ,“ – ამბობს თაკო მამეიშვილი, ორგანიზაციის „აღმოსავლეთ ევროპის ცენტრი მრავალპარტიული დემოკრატიისთვის“ კოორდინატორი ბათუმში. მან დღეს, 20 ნოემბერს, ახალი პროგრამის პრეზენტაცია მოაწყო ბათუმის „დემოკრატიის სკოლაში“.

პროგრამა ერთწლიანია და მასში მონაწილეობის მისაღებად 20 მსმენელი შეირჩევა. 15 დეკემბრიდან მომავალი წლის თებერვლის ჩათვლით, კვირაში ორჯერ მოწვეული ექსპერტები სხვადასხვა თემაზე ჩაატარებენ ლექციას და მონაწილეები პრაქტიკულ დავალებებს შეასრულებენ, მათ შორის, ქალაქგეგმარების და ურბანული განვითარების, ეკონომიკის, გარემოსდაცვითი, დეცენტრალიზაციის, ადვოკატირების, პოლიტიკური დიალოგის საკითხებზე.

ამ ეტაპის გავლის შემდეგ კი, მონაწილეებს შეეძლებათ მცირე გრანტების მიღება [2000  – 2500 აშშ დოლარი საშუალოდ] კონკრეტული მიმართულებით, ასევე სამოქალაქო კონგრესში მონაწილეობა. კონგრესში სხვა თვითმმართველი ქალაქების მოქალაქეები მიიღებენ მონაწილეობას, ასევე პოლიტიკური პარტიების წარმომადგენლები.

„პროგრამის აქტიურ მონაწილეებს შესაძლებლობა ექნებათ შეხვდნენ სხვადასხვა პოლიტიკური პარტიის და ადგილობრივი თვითმმართველობის წარმომადგენლებს. შეიქმნება ერთგვარი პლატფორმა პოლიტიკური დიალოგისთვის… მონაწილეები ჩაერთვებიან რეგიონული განვითარების საჭიროებების კვლევასა და პოლიტიკის დოკუმენტის მომზადებაში, ისინი მონაწილეობას მიიღებენ მაღალი დონის პოლიტიკური დიალოგის ფორმატის შეხვედრებში,“ – აღნიშნავს თაკო მამეიშვილი.

პროექტში მონაწილეობისთვის აპლიკაციების მიღება გამოცხადდა სხვა ქალაქებშიც: თელავში, გორში, ქუთაისსა და თბილისში.

მეტი ინფორმაციისთვის ამ პროგრამის შესახებ ეწვიეთ ვებ-გვერდს: eecmd.org

გადაბეჭდვის წესი


ასევე: