„შექმნილი ვითარებიდან გამომდინარე ხვალ გავაკეთებთ სპეციალურ განცხადებას და სავარაუდოდ დავტოვებთ ქართულ ფეხბურთს და დინამო ბათუმს,” – ამ განცხადებას საფეხბურთო კლუბ “დინამო ბათუმის” მფლობელი არჩილ ბერიძე აკეთებს.
ბერიძის განცხადება “დინამო ბათუმის” ოფიციალურ გვერდზე გავრცელდა. დამატებითი განმარტებებისგან არჩილ ბერიძე ამ ეტაპზე თავს იკავებს.
როგორც “ბათუმელებისთვის” გახდა ცნობილი, ბერიძემ ეს გადაწყვეტილება დღეს გამართული საფეხბურთო მატჩის შემდეგ მიიღო. „ბათუმის დინამო“ საჩხერის „ჩიხურასთან“ 2-ბურთიანი სხვაობით დამარცხდა.
საქმე იმაშია, რომ პირველ ტაიმში მატჩის მსაჯმა „ჩიხურას“ კარის მიმართულებით აშკარა პენალტი არ დანიშნა, ხოლო მეორე ტაიმში ასევე არ დანიშნა ჯარიმა.
საჩხერელებმა მეორე ტაიმში ორი ბურთის გატანა შეძლეს. “დინამო ბათუმი” დამარცხდა ანგარიშით 2:0.
https://www.facebook.com/DinamoBatumi1923/photos/a.1468796483333147/2345379822341471/?type=3&theater
“დინამო ბათუმი” მართვაში „ლამინი ჯგუფს“ ოფიციალურად 6 ოქტომბერს გადაეცა.
ბათუმის დინამოს „ლამინი ჯგუფისთვის“ გადაცემაზე ინფორმაცია საქართველოს ფეხბურთის ფედერაციამ გაავრცელა. აჭარის მთავრობის პრესსამსახურის ინფორმაციით კი, „ხელი მოეწერა ურთიერთთანამაშრომლობის მემორანდუმს აჭარის მთავრობას, ბათუმის მერიასა და ბათუმის დინამოს სპონსორს შორის, რომელიც მიზნად ისახავს ფეხბურთის განვითარებას აჭარაში, სპორტული ინფრასტრუქტურის მოწყობას და ბავშვთა საფეხბურთო აკადემიის მშენებლობას“.
