ბათუმის მერია მშენებლობის მოსაკრებლის გამოთვლის წესს ცვლის. მას შემდეგ, რაც ცვლილებას საკრებულო დაამტკიცებს, მშენებლები ნებართვის მისაღებად დაგეგმილი სამშენებლო პროექტის 1 კვადრატულ მეტრზე 1 ლარს გადაიხდიან, იგულისხმება კ2- ის საანგარიშო ფართობი, რაც სამშენებლო ნაკვეთის ფართობთან მიმართებაში პროექტის მასშტაბს განსაზღვრავს [ამ ფართობში არ შედის კიბის უჯრედი და აივნები].
ამ დრომდე მშენებლობის ნებართვის მოსაკრებელი მშენებლობის ფართობის [კ1] მიხედვით გამოითვლებოდა. ახალი ცვლილება იმას ნიშნავს, რომ ცვლილების დამტკიცების შემდეგ უმეტეს შემთხვევაში გადასახადი გაიზრდება [ბათუმში მშენებლობების მასშტაბების ტენდენციის გათვალისწინებით].
მაგალითისთვის განვიხილოთ ბათუმში უკვე აშენებული ერთ-ერთი მასშტაბური სამშენებლო პროექტი:
კომპანიამ ბათუმში 4 848 კვადრატულ მეტრზე 41-სართულიანი მრავალფუნქციური კომპლექსი ააშენა. რეესტრის მონაცემებით, შენობის დაზუსტებული ფართობი 56 495,33 კვადრატული მეტრია. მოქმედი წესის მიხედვით, ამ კომპანიას მშენებლობის ნებართვის მოსაკრებლის სახით, სავარაუდოდ, 4 848 ლარი აქვს გადახდილი – მოსაკრებელი მშენებლობის ფართობის მიხედვით დაითვლებოდა. გადასახადი ამ შემთხვევაშიც 1 კვადრატულ მეტრზე 1 ლარი იყო.
შეცვლილი წესით კი, კომპანია ამ შენობის მშენებლობის ნებართვისთვის მოსაკრებლის სახით 50 000 ლარზე მეტს ან დაახლოებით ამდენს გადაიხდიდა.
იგივე წესი ვრცელდება უკვე აშენებულ შენობაზე სართულების დამატების ნებართვის, ასევე დემონტაჟის ნებართვის მოსაპოვებლად. ამ თანხის გადახდაზე კონტროლი მუნიციპალიტეტის არქიტექტურის სამსახურის პრეროგატივაა.
დადგენილების მიხედვით, მოსაკრებლის გადახდისაგან გათავისუფლებულია სტიქიური უბედურების შედეგად დაზარალებულ ობიექტთა აღდგენითი სამუშაოები. ასევე დადგენილება მოსაკრებლის გადახდას არ ითვალისწინებს, თუ ნებართვის მაძიებელი თავად მუნიციპალიტეტია.
საკრებულოს დადგენილების პროექტის განმარტებითი ბარათის მიხედვით, ცვლილება ახალი სამშენებლო კოდექსის ამოქმედებამ განაპირობა. დადგენილების პროექტს საკრებულო 30 ოქტომბერს, სხდომაზე განიხილავს.
