ბათუმის მერია კახაბერში სამი მიწის ნაკვეთისთვის ზონის სტატუსის შეცვლის საკითხს განიხილავს, სამივე მიწის ნაკვეთი სარეკრეაციო ზონაშია და 7 473 კვადრატულ მეტრ ტერიტორიას მოიცავს. მესაკუთრე მერიისგან ითხოვს მიწის ნაკვეთებს სამრეწველო ზონის სტატუსი მიენიჭოს.
მერია საკითხის შესწავლის და გადაწყვეტილების მიღების მიზნით ადმინისტრაციული წარმოების დაწყებას გეგმავს, რისთვისაც თანხმობას საკრებულოს სთხოვს. საკრებულოს ბიურომ ეს საკითხი უკვე განიხილა და მომავალი სხდომის დღის წესრიგში შეიტანა.
განკარგულების პროექტის განმარტებით ბარათში არაფერია ნათქვამი იმაზე, თუ ვინ და რატომ ითხოვს კახაბერში სამი საკადასტრო ერთეულისთვის სტატუსის შეცვლას. საჯარო რეესტრის მონაცემებით კი, ამ ნაკვეთების მესაკუთრე ნოდარ შალიკაშვილია.
ზონის სტატუსის შეცვლას ითხოვენ ასევე ბათუმში მაიაკოვსკის #4-ში მდებარე მიწის ნაკვეთზეც. ამ შემთხვევაშიც მესაკუთრე სარეკრეაციო ზონაში არსებული ნაკვეთისთვის სამრეწველო ზონის სტატუსის მინიჭებას ითხოვს. ეს ტერიტორია 3 267 კვადრატული მეტრია და შპს „პეტროლფის“ საკუთრებაშია.
შპს „პეტროლფი“ 2019 წელსაა დაფუძნებული და კომპანიის ასივე პროცენტი გიორგი რამიშვილის ეკუთვნის. ინფორმაცია, თუ რატომ ითხოვს მესაკუთრე ნაკვეთისთვის ზონის სტატუსის შეცვლას, განმარტებით ბარათში არც ამ შემთხვევაში იძებნება. მერიამ საკრებულოს არ განუმარტა რა პროექტის განხორციელებას გეგმავს ტერიტორიაზე მესაკუთრე.
იმ შემთხვევაში თუ საკრებულო ადმინისტრაციული წარმოების დაწყებას მხარი დაუჭერს, მერია ვალდებულია შესაბამისი დოკუმენტები საჯაროდ გამოაქვეყნოს.
