Batumelebi | ჯაპანა-ლანჩხუთის გზის 4-ზოლიანი მონაკვეთი 2020 წელს გაიხსნება ჯაპანა-ლანჩხუთის გზის 4-ზოლიანი მონაკვეთი 2020 წელს გაიხსნება – Batumelebi
RU | GE  

ჯაპანა-ლანჩხუთის გზის 4-ზოლიანი მონაკვეთი 2020 წელს გაიხსნება

საავტომობილო გზების დეპარტამენტის ცნობით, სამტრედია-გრიგოლეთის გზაზე ჯაპანა-ლანჩხუთის 14 კმ-იანი მონაკვეთი 2020 წელს გაიხსნება.

ყველაზე მჭიდროდ დასახლებულ მონაკვეთზე ჯაპანიდან ლანჩხუთის ცენტრამდე გადაადგილება შესაძლებელი იქნება ახალი 4-ზოლიანი მაგისტრალური გზით.

სამტრედია-გრიგოლეთის მე-2 მონაკვეთის მშენებლობის პროექტი 18.5-კილომეტრიანი 4-ზოლიანი ასფალტ–ბეტონის გზის, 16 სახიდე გადასასვლელის, მათ შორის, 3 სატრანსპორტო კვანძის (გზაგამტარი), წყალგამტარი მილებისა და მიწისქვეშა გასასვლელების მშენებლობას ითვალისწინებს.

დეპარტამენტის ცნობით, პროექტის მიზანია, ქვეყნის მასშტაბით ყველაზე მაღალი ინტენსივობის საერთაშორისო მნიშვნელობის გზაზე მზარდი სატრანსპორტო ნაკადების გამტარუნარიანობის, უსაფრთხო საავტომობილო მგზავრობისა და შეუფერხებელი სატრანზიტო მიმოსვლის უზრუნველყოფა.

სამტრედია-გრიგოლეთის საავტომობილო გზის მე-2 მონაკვეთი გურიის რეგიონში ქ. ლანჩხუთსა და ლანჩხუთის მუნიციპალიტეტის სოფლებს: ჯაპანას, ქვიანს, ნიგოითსა და ქვემო შუხუთს გაივლის.

პროექტის სახელშეკრულებო ღირებულება 254 მილიონ ლარს შეადგენს. სამუშაოებზე 400-მდე ადამიანია დასაქმებული.

სამუშაოები ასევე მიმდინარეობს სამტრედია-გრიგოლეთის გზის პირველ და მეოთხე მონაკვეთებზე, ხოლო მესამე მონაკვეთზე, სადაც ვალდებულებების შეუსრულებლობის გამო კონტრაქტორს ხელშეკრულება შეუწყდა, სატენდერო დოკუმენტაციის მომზადება და დონორ ორგანიზაციასთან მოლაპარაკება მიმდინარეობს ტენდერის ხელახლა გამოსაცხადებლად.

_ _ _

სამტრედია-გრიგოლეთის მშენებარე გზის მესამე მონაკვეთზე ვალდებულებების შეუსრულებლობის გამო დეპარტამენტმა ხელშეკრულება კომპანია „ტოდინთან“ შეწყვიტა. ეს კომპანია კი ხულო-ზარზმის გზის ტენდერშია გამარჯვებული. სახარბიელო მდგომარეობა არც ამ გზის მშენებლობაზეა.

„ხულო-ზარზმის გზის ორივე ლოტზე სამუშაოების პროგრესი არის ძალიან სუსტი. შესაბამისად, კონტრაქტორის მიმართ ორივე ლოტზე გამოცემულია გამოსწორების შეტყობინებები ზედამხედველი ინჟინრების მიერ და კონტრაქტორმა უნდა გამოასწოროს ვალდებულებები.“, – აღნიშნული იყო წერილში, რომელიც „ბათუმელებმა“ საქართველოს საავტომობილო გზების დეპარტამენტისგან დაახლოებით ორი თვის წინ მიიღო.

რაც შეეხება უშუალოდ სამტრედია-გრიგოლეთის გზას, ის გრიგოლეთი-ჩოლოქის ახალი გზით უნდა შეუერთდეს ქობულეთის შემოვლით გზას. მიმდინარე წელს შემცირდა დონორული დაფინანსება გრიგოლეთი-ქობულეთის [ჩოლოქის] ახალი გზის მონაკვეთის მშენებლობაზეც [კრედიტების ნაწილში 22.7 მილიონი ლარით]. საქართველოს მთავრობის ინფორმაციით, შეფერხება გამოწვეულია კონტრაქტორი კომპანიის მიერ. შეფერხებებია რიკოთის უღელტეხილზე მშენებარე ახალი გზის მშენებლობაშიც.

გრიგოლეთი-ჩოლოქის გზის მშენებლობა კონტრაქტორი კომპანიის მიზეზით შეფერხებულია – მთავრობა

__________

ფოტო: საავტომობილო გზების დეპარტამენტი

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.