შუახევში აგროსერვისცენტრის მშენებლობა, რისთვისაც ხელშეკრულება 177 348 ლარზე იყო გაფორმებული, ტენდერში გამარჯვებულმა კომპანია „ჭედა 2012“-მა შეწყვიტა. კომპანიისთვის ავანსად იყო გადახდილი 35 469 ლარი, ხელშეკრულებით გაფორმებული ეტაპების დარღვევისთვის და ხელშეკრულების შეწყვეტის გამო კი, კომპანიას 9 436 ლარის პირგასამტეხლოს გადახდაც დაეკისრა.
„კომპანიამ შეასრულა 17 ათასი ლარის სამუშაო, დანარჩენი თანხა კი, საგარანტიოთი ამოვიღეთ. ასე, რომ ბიუჯეტს ფინანსურად, ამ კუთხით, არ უზარალია. რაც შეეხება პირგასამტეხლოს, კომპანიას არ გადაუხდია, რის გამოც მივმართეთ სასამართლოს. პროცესი ჯერ არ ჩანიშნულა,“ – გვითხრა აჭარის სოფლის მეურნეობის სამინისტროს ა[ა]იპ „აგროსერვის ცენტრის“ დირექტორმა გოჩა ბერიძემ.
შუახევში აგრომომსახურების ცენტრის შენობის მშენებლობასა და ინფრასტრუქტურის მოწყობაზე ტენდერი მიმდინარე წლის დასაწყისში „აგროპროექტების მართვის ცენტრმა“ გამოაცხადა და ხელშეკრულებაც გააფორმა გამარჯვებულთან. ამ ცენტრის გაუქმების შემდეგ კი პროექტი გადაეცა „აგროსერვისცენტრს“. მშენებლობა 2019 წლის ოქტომბრამდე უნდა დასრულებულიყო.
„როცა შევატყვეთ, რომ კომპანია ვერ ასრულებდა სამუშაოს გეგმა-გრაფიკის მიხედვით და ბოლოს, როცა საერთოდ შეწყვიტა სამუშაოები, ხელშეკრულება გავაუქმეთ. სხვა გამოსავალი არ იყო და მშენებლობის გასაგრძელებლად ახალი ტენდერი გამოვაცხადეთ,“ – გვითხრა გოჩა ბერიძემ, „აგროსერვისცენტრის“ დირექტორმა.
ესკიზი
ახალ ტენდერში წინადადებების მიღება 2019 წლის 31 ოქტომბერს დასრულდება. შესყიდვის სავარაუდო ღირებულება კი 200 977 ლარია.
ეს იქნება ორწლიანი შესყიდვა [2019 წელი – 30 977 ლარი, 2020 წელი – 170 000 ლარი], „აგროსერვისცენტრის“ მშენებლობა და კეთილმოწყობა კი 2020 წლის 2 ივნისამდე უნდა დასრულდეს.
სატენდერო დოკუმენტებიდან
რატომ შეაჩერა კომპანია „ჭედა 2012“-მა მშენებლობა, „აგროსერვისცენტრში“ ვერ აკონკრეტებენ: „რამდენადაც ვიცით, თავად კომპანიას შეექმნა პრობლემები სხვა პროექტებში“.
„ჭედა 2012“ რეგისტრირებულია ქობულეთში 2012 წელს. მისი მესაკუთრე და დირექტორი მაია აბუსელიძე იყო. რეესტრის ბოლო ამონაწერით კი, კომპანიის მესაკუთრე და დირექტორი ზია ბოლქვაძეა. დოკუმენტების მიხედვით კომპანიის 100% წილი საკუთრებაში ზია ბოლქვაძემ უსასყიდლოდ მიიღო.
„ჭედა 2012“-ს „ბათუმელები“ ვერც ამჯერად დაუკავშირდა. არადა, ამ კომპანიამ 2019 წელს, ნაკისრი ვალდებულებები აჭარაში კიდევ სამ სხვადასხვა პროექტის შემთხვევაში ვერ შეასრულა, რის გამოც, ოთხივე შემთხვევაში [აგროსერვისცენტრის ჩათვლით], ის შესყიდვების სააგენტომ შავ სიაში შეიყვანა.
ეს სამი პროექტია:
[crosslist]
- დაბა ქედაში რუსთაველის ქუჩასთან მდებარე მინისპორტული მოედნის რეკონსტრუქცია – სახელშეკრულებო თანხა 47 936 ლარი;
- ხელვაჩაურის სოფლებში შიდა სასოფლო გზის ბეტონის საფარით მოწყობის სამუშაოები – სახელშეკრულებო თანხა 152 538 ლარი;
- გონიო-აფსაროსის მუზეუმ-ნაკრძალში რომაული ბანაკისათვის ანგარისა და არენის მოწყობის სამუშაოების შესყიდვა – სახელშეკრულებო თანხა 93 990 ლარი.
[/crosslist]
ამ თემაზე:
ავანსად გადარიცხული 93 990 ლარი – გონიოში რომაული ბანაკი ვერ მოეწყო
