ბათუმის მე-6 საჯარო სკოლის ახალი კორპუსის მშენებლობა იწყება


ბათუმში, ფიროსმანის ქუჩაზე მდებარე N6 საჯარო სკოლის ახალი კორპუსის მშენებლობა იწყება. არსებული კორპუსის ნაწილობრივი რეაბილიტაციისა და ახალი კორპუსის მშენებლობისთვის აჭარის ბიუჯეტიდან 3 491 578 ლარი იყო გამოყოფილი. ტენდერში გამარჯვებულ კომპანია „ალიგატორ პროვაიდერ ჯორჯიასა“ და აჭარის განათლების სამინისტროს შორის კი ხელშეკრულება, 2 890 062 ლარზე, 2019 წლის 11 სექტემბერს გაფორმდა.

კომპანიის დირექტორის, მერაბ ბერიძის ინფორმაციით, სკოლის ეზოში უკვე შეტანილია სპეციალური მასალები, შემოიღობება ტერიტორია და დაიწყება ინტენსიური სამშენებლო სამუშაოები.

ახალი კორპუსის მშენებლობა 2021 წლის 11 სექტემბრამდე უნდა დასრულდეს. რაც შეეხება არსებული კორპუსის რეაბილიტაციას, ხელშეკრულების მიხედვით სამუშაოები, სავარაუდოდ, 2021 წლის აპრილიდან სექტემბრამდე პერიოდში შესრულდება.

სამინისტროს განცხადებით, პროექტის მიხედვით „უნდა აშენდეს სამსართულიანი შენობა, რომელიც გათვლილია 540 მოსწავლეზე ერთ ცვლაში. შენობაში განთავსდება 18 საკლასო ოთახი და დამხმარე ოთახები, ლაბორატორიები და ბიბლიოთეკა, სპორტული და სააქტო დარბაზები, სასადილო. შენობა ადაპტირებული იქნება, მოეწყობა ლიფტი, შესაბამისი სველი წერტილები და პანდუსი. ასევე, განხორციელდება არსებული შენობის სახურავის და ფასადის რეაბილიტაცია. ეზო სრულად კეთილმოეწყობა. აქვე განთავსდება ღია სპორტული მოედანი ტრიბუნებით“.

ბათუმის მე-6 საჯარო სკოლის არსებული კორპუსი [მარჯვნივ] და ტერიტორია, სადაც ახალი კორპუსი უნდა აშენდეს / ფოტო „ბათუმელები“ / 25.09.2019

მთავარი ფოტო: მე-6 სკოლის ახალი კორპუსის მაკეტი პროექტიდან

ამ სკოლის არსებული შენობის მხოლოდ ნაწილობრივ რეაბილიტაციაზე ტენდერი სამინისტრომ 2018 წლის თებერვალშიც გამოაცხადა, თუმცა რამდენიმე დღეში ტენდერი შეწყვიტა. სატენდერო თანხა 610 769 ლარი იყო.

ტენდერის შეწყვეტის შესაბამის ოქმში ვკითხულობთ, რომ არსებული შენობის რეაბილიტაცია და ახალი კორპუსის მშენებლობა ერთი პროექტია, ამიტომ ის უნდა გადასცემოდა ბათუმის მუნიციპალიტეტს. თუმცა პროექტს ისევ სამინისტრო განახორციელებს.

ამ თემაზე:

ბათუმის N6 საჯარო სკოლის ნაწილობრივი რეაბილიტაცია – აშენდება თუ არა ახალი კორპუსი

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com