მთავარი,სიახლეები

ბათუმის სოციალურ სასადილოებსა და თავშესაფარში 4 დღეა გარკვეული პროდუქტები არ შედის

25.09.2019 • 1034
ბათუმის სოციალურ სასადილოებსა და თავშესაფარში 4 დღეა გარკვეული პროდუქტები არ შედის

ბათუმის სოციალური სერვისების სააგენტოს ინფორმაციით, მათ დაქვემდებარებაში არსებული სასადილოები და დროებითი ღამის თავშესაფარი მეოთხე დღეა რძით, რძისა და სხვა სახის პროდუქტებით აღარ მარაგდება. ტენდერში გამარჯვებული კომპანია „სოსი“ სააგენტომ 23 სექტემბერს 10 ათასამდე ლარით დააჯარიმა, ხოლო დღეს, 25 სექტემბერს, ხელშეკრულება შეუწყვიტა.

სოციალური სერვისების სააგენტოს მონაცემებით, „სოციალურად დაუცველი, სიღარიბის ზღვარს მიღმა მყოფი 5 182 ბენეფიციარი და დროებითი ღამის თავშესაფრის 50 უსახლკარო ბენეფიციარი რჩება საკვების გარეშე“, ამიტომ ერთი თვის მარაგს ტენდერის გარეშე შეისყიდიან. ამ პერიოდში კი ხელახლა ტენდერს გამოაცხადებენ, მიმდინარე წლის ბოლომდე შესაბამისი მომარაგების მიზნით.

სოციალური სერვისების სააგენტოში „ბათუმელებს“ უთხრეს, რომ ბენეფიციარებისთვის საკვების მიწოდებაში პრობლემა არ შექმნილა, თუმცა ზოგი პროდუქტის მარაგი ამოწურულია და ელოდებიან შესყიდვების სააგენტოსგან თანხმობას ერთი თვის მარაგის დროულად შესაძენად.

ამონარიდი სააგენტოს მოხსენებითი ბარათიდან

შპს „სოსის“ ორი ტენდერი ჰქონდა მოგებული. შესაბამისად, ხელშეკრულებები 96 946 და 96 493 ლარზე იყო გაფორმებული. შესყიდვების სააგენტოს ოფიციალური პორტალის მონაცემებით, კომპანიისთვის 25 სექტემბრის მდგომარეობით გადახდილია, შესაბამისად, 57 549 ლარი (59%) და 68 352 ლარი (71%).

„ბათუმელები“ შეეცადა დაკავშირებოდა კომპანიას, თუმცა ჩვენს სატელეფონო ზარებს არ უპასუხეს.

გადაბეჭდვის წესი


ასევე: