13 სექტემბერს შავ ზღვაზე ფართომასშტაბიანი წვრთნები ჩატარდება.
წვრთნების მიზანი საქართველოს ტერიტორიულ წყლებში ნავთობის მე-2 დონის დაღვრისას ბრძოლისათვის მზადყოფნისა და რეაგირების შესაძლებლობის შემოწმებაა, ასევე, იმის შემოწმება, თუ რამდენად კოორდინირებულად იმოქმედებენ შესაბამისი ორგანოები ზღვაზე ადამიანის ძებნა-გადარჩენის ოპერაციისას.
წვრთნებს კოორდინაციას საზღვაო ტრანსპორტის სააგენტოს ზღვაზე ძებნა-გადარჩენისა და გემების მოძრაობის მონიტორინგის დეპარტამენტის საზღვაო სამაშველო საკოორდინაციო ცენტრი გაუწევს.
წვრთნები ორ ადგილას – ზღვაში და ნაპირზე გაიმართება. მასში სრულად ჩაერთვება „ზღვაში ნავთობის დაღვრაზე რეაგირების ეროვნული გეგმით“ გათვალისწინებული სახელმწიფო და კერძო ორგანიზაციები. მონაწილეობას მიიღებს შავი ზღვის ქვეყნების 6 გემი, 4 კატარღა, 2 ბუქსირი და 1 შვეულმფრენი.
ბათუმში დღეს დაიწყო შავი ზღვის სანაპირო ქვეყნების ძებნა-გადარჩენის რიგით მე-15 კონფერენცია.
კონფერენციაზე შავი ზღვის აუზის ქვეყნებს შორის გამოცდილების გაზიარებასა და შავ ზღვაზე ძებნა-გადარჩენის სფეროში თანამშრომლობის გაძლიერების საკითხები განიხილება.
„მნიშვნელოვანია მსგავსი კონფერენცია, იმიტომ, რომ მზად ვიყოთ, კოორდინირებულად და თანმიმდევრულად ვიმოქმედოთ ინციდენტების დროს შავ ზღვაზე,“ – ამბობს საზღვაო ტრანსპორტის სააგენტოს ხელმძღვანელი თამარ იოსელიანი.