რატომ შემცირდა უცხოური ინვესტიციები აჭარაში – თორნიკე რიჟვაძის განმარტება


აჭარაში 2019 წლის პირველ და მეორე კვარტალში პირდაპირი უცხოური ინვესტიციები, 2018 წლის ანალოგიურ პერიოდთან შედარებით, 27,4 მილიონი აშშ დოლარით შემცირდა. “ბათუმელებმა” აჭარის მთავრობის თავმჯდომარეს ჰკითხა, რა არის ინვესტიციების შემცირების მიზეზი.

“2018 წლის პირველი კვარტალიდან დაწყებული ჩვენ გვქონდა კლების ტენდენცია და შემდეგ უკვე 2019 წლის პირველ კვარტალში გვქონდა 209 %-იანი ზრდა პირდაპირი უცხოური ინვესტიციების.  რაც შეეხება მეორე კვარტალს, მეორე კვარტალში შეიმჩნევა კლების ტენდენცია, თუმცა უნდა აღვნიშნოთ, ექვსთვიან ჭრილში ჩვენ გვაქვს 64 %-იანი შესრულება, რაც არის გასული წლის მაჩვენებელთან მიმართებაში ზრდის ტენდენცია და საბოლოო ჯამში ჩვენი მოქალაქეებისთვის მნიშვნელოვანია სამუშაო ადგილები,” – განმარტა აჭარის მთავრობის თავმჯდომარემ.

თორნიკე რიჟვაძე ამბობს, რომ წლის ბოლომდე ინვესტიციების ზრდას ელის.

“სამუშაო ადგილებს ქმნის როგორც პირდაპირი უცხოური ინვესტიციები, ასევე, ქმნის ადგილობრივი ინვესტიციები. ჩვენი გეგმა არის წლის ბოლომდე 3 მილიარდი ლარის საინვესტიციო პორტფელი და 6 ათასი სამუშაო ადგილი”, – ამბობს თორნიკე რიჟვაძე.

2019 წლის პირველ კვარტალში აჭარაში პირდაპირმა უცხოური ინვესტიცია 26 მილიონი აშშ დოლარი იყო, ხოლო ამავე წლის მეორე კვარტალში – 22,5 მილიონი აშშ დოლარი.

ამავე თემაზე:

აჭარაში პირდაპირი უცხოური ინვესტიციები შემცირებულია – საქსტატი

ნეტგაზეთის მასალების სხვა გამოცემებში გადაბეჭდვის წესი
ავტორი