აჭარაში 2019 წლის პირველ და მეორე კვარტალში პირდაპირი უცხოური ინვესტიციები, 2018 წლის ანალოგიურ პერიოდთან შედარებით, 27,4 მილიონი აშშ დოლარით შემცირდა.
საქართველოს სტატისტიკის ეროვნული სამსახურის [საქსტატი] მონაცემებით, გასული წლის პირველ ორ კვარტალში უცხოურმა ინვესტიციებმა აჭარაში 76 მილიონი აშშ დოლარი შეადგინა, 2019 წლის პირველ ორ კვარტალში კი – 48,6 მილიონი აშშ დოლარი.
2019 წლის პირველ კვარტალში აჭარაში პირდაპირმა უცხოურმა ინვესტიციამ 26 მილიონი აშშ დოლარი შეადგინა, ხოლო ამავე წლის მეორე კვარტალში – 22,5 მილიონი აშშ დოლარი.
5,5-ჯერ შემცირდა პირდაპირი უცხოური ინვესტიციები აჭარაში 2018 წელს, 2017 წელთან შედარებით.
თუ რა რაოდენობის უცხოური, ასევე, ადგილობრივი კერძო სექტორის ინვესტიციები განხორციელდა აჭარაში 2017 და 2018 წელს – ამ ინფორმაციის მისაღებად აჭარის ფინანსთა და ეკონომიკის სამინისტროს წერილობით 2019 წლის დასაწყისში მივმართეთ, თუმცა სამინისტროდან ასევე წერილობით გვიპასუხეს, რომ ასეთ ინფორმაციას არ ფლობენ.
საქსტატის წინასწარი ინფორმაციით, 2019 წლის მე-2 კვარტალში პირდაპირი უცხოური ინვესტიციები მთელი ქვეყნის მასშტაბით 53.7%-ით შემცირდა. მე-2 კვარტალში ქვეყანაში სულ 187 მლნ აშშ დოლარის მოცულობის პირდაპირი უცხოური ინვესტიცია შემოვიდა, ანუ 216.6 მლნ აშშ დოლარით ნაკლები, ვიდრე 2018 წლის შესაბამის პერიოდში.
ამ თემაზე:
https://netgazeti.ge/news/390682/
