რამდენით იზრდება პედაგოგების ხელფასები ამ სასწავლო წელს – მინისტრის განცხადება


საქართველოს განათლებისა და მეცნიერების მინისტრმა, მიხეილ ბატიაშვილმა დღეს პედაგოგებთან გამართულ შეხვედრაზე იმაზე ისაუბრა, თუ რამდენით გაეზრდებათ ხელფასები მასწავლებლებს სტატუსის მიხედვით ახალი სასწავლო წლიდან. მინისტრმა კონკრეტული თანხა დაასახელა.

მიხეილ ბატიაშვილის განცხადებით, „2019 წლის ოქტომბრის დასაწყისში ყველა პედაგოგს, რომელსაც აქვს სტატუსი და აქვს მინიმუმ 15 საგაკვეთილო საათი, ანაზღაურება გაეზრდება 150 ლარით.

უფროსი მასწავლებელი, სტატუსის გარდა, მიიღებს საათობრივ დანამატთან ერთად 1011 ლარს, წამყვანი მასწავლებელი – 1435 ლარს, მენტორი მასწავლებელი – 1745 ლარს. მეტი საგაკვეთილო საათის შემთხვევაში ანაზღაურება კიდევ უფრო მეტი იქნება“.

პედაგოგებს, რომლებსაც 15 საგაკვეთილო საათზე ნაკლები აქვთ, საშუალოდ 100 ლარით გაეზრდებათ ანაზღაურება.

მინისტრის თქმით, ხელფასის ზრდა შეეხება ყველა პედაგოგს, ვისაც სტატუსი აქვს.

მინისტრი აცხადებს, რომ ხელფასების გაზრდა გაგრძელდება ყოველ შემოდგომაზე.

დღეს მასწავლებლების ხელფასების გაზრდაზე ისაუბრა პრემიერ-მინისტრმა მამუკა ბახტაძემაც.

მასწავლებლებთან შეხვედრა თბილისში

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან