„დროა, გამოვააშკარაოთ უსაფრთხოების სისტემაში რუსეთის მიერ ჩანერგილები“ – დეკანოიძე ლეჟავას დანიშვნაზე 


„ერთიანი ნაციონალური მოძრაობის“ ლიდერი, ხატია დეკანოიძე თავდაცვისა და უშიშროების საკითხებში საქართველოს პრეზიდენტის მრჩევლად დიმიტრი ლეჟავას დანიშვნას  გამოეხმაურა. მან მსგავსი ფაქტების აღმოსაფხვრელად ლუსტრაციის კანონის ამოქმედების მნიშვნელობაზე ისაუბრა “რუსთავი 2”-ის ეთერში:

„მნიშვნელოვანია, რომ საზოგადოებამ ლუსტრაციის კანონზე დაიწყოს  მსჯელობა, კანონზე, რომელიც კარგად გაწერილი და შეთანხმებული იქნება. ხელისუფლების შეცვლის, ბიძინა ივანიშვილის ჩამოცილების შემდეგ რეალურად გვექნება ინსტრუმენტი, რომ დროა გამოვააშკარაოთ ადამიანები, რომელთა ჩანერგვაც მოხდა რუსული სპეცსამსახურების მიერ ჩვენი უსაფრთხოების სისტემაში. ეს არის უსაფრთხოების სისტემის გაწმენდის ძალიან  მნიშვნელოვანი გზა, რომელიც, პრაქტიკულად, დღეს აღარ არსებობს და მთელი უსაფრთხოების სისტემა სპეცსამსახურების მიერაა დაკომპლექტებული“, – აცხადებს დეკანოიძე.

ეროვნული ბიბლიოთეკის არქივში დაცული ინფორმაციით, დიმიტრი ლეჟავა არის ბრიგადის გენერალი. იგი 1983-1994 წლებში მუშაობდა საქართველოს სახელმწიფო უშიშროების ორგანოებში, 1994-96 წლებში – სახელმწიფო დაცვის სპეცსამსახურში, 1996-98 წლებში – ეროვნული უშიშროების საბჭოს აპარატში (1996-1998). ასევე, იყო საქართველოს თავდაცვის სამინისტროს კადრების მთავარი სამმართველოს უფროსი.

 

საქართველოს პრეზიდენტის ადმინისტრაციის განმარტება:

მისი პროფესიული გამოცდილებით ვიხელმძღვანელეთ – პრეზიდენტის ადმინისტრაცია ლეჟავას დანიშვნაზე

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან