„საბჭოთა აფხაზეთი და ოსეთი“ სარესტავრაციოდ ბათუმიდან თბილისში მიაქვთ

აკაკი წერეთლის სახელობის ბათუმის საჯარო ბიბლიოთეკამ პრესისა და პერიოდიკის საცავი განაახლა. ბიბლიოთეკის დირექტორის, ინგა გოგიბერიძის თქმით, არქივში დაცული ისეთი გაზეთები, რომლებიც ჩამოწერას ექვემდებარებოდა, სარესტავრაციოდ თბილისში, ეროვნულ ბიბლიოთეკაში გაიგზავნა. დღეს, 18 აგვისტოს, თბილისში ბათუმიდან საბჭოთა აფხაზეთისა და საბჭოთა ოსეთის პერიოდის გაზეთები გააგზავნეს.

„ეს გაზეთები იყო ძალიან ცუდ მდგომარეობაში, გადაფურცვლაც კი არ შეიძლებოდა. ვცადეთ, მაგრამ მათი რესტავრაცია ბათუმში შეუძლებელი აღმოჩნდა. ბათუმის საჯარო ბიბლიოთეკაში ჩვენი მოწვევით, მივლინებით იყო საქართველოს პარლამენტის ეროვნული ბიბლიოთეკის გენერალური დირექტორის მოადგილე, მირიან ხოსიტაშვილი, რომელმაც პრესის და პერიოდიკის საცავიც მოინახულა. საუბარი იყო პერიოდულ გამოცემათა დაკაბადონებაზეც. ბოლო 10 წელია პერიოდიკის დაკაბადონება არ მომხდარა. რაც შეეხება საბჭოთა აფხაზეთისა და ოსეთის გაზეთების რესტავრაციას, ეს საკითხიც ამ შეხვედრაზე გადაწყდა. ეროვნულ ბიბლიოთეკაში მოხდება მათი რესტავრაცია და დაგვიბრუნდება უკან. ერთი თვეა რაც პრესისა და პერიოდიკის საცავს 21 კვ/მ ფართობი დავამატეთ, განვაახლეთ და აქ დაცულ ყველა ეგზემპლარს თავისი ადგილი მივუჩინეთ“, – გვითხრა ინგა გოგიბერიძემ.